Evropa gati të nisë negociatat me Putin/ “Misionarët e paqes” Angela Merkel dhe Mario Draghi?

Qeveritë e BE-së duket se janë gati për të hapur një front bisedimesh me presidentin rus Vladimir Putin, pas “armiqësimit” të raporteve me nisjen e luftës në Ukrainë. Zyrtarët europianë po diskutojnë nëse ish-Presidenti i Bankës Qendrore Evropiane, Mario Draghi, apo ish-Kancelarja Gjermane, Angela Merkel, mund të veprojnë si një bllok në negociatat.

Sipas “Financial Times”, ministrat e jashtëm do të diskutojnë meritat e kandidatëve potencialë në një takim të BE-së në Qipro javën e ardhshme, pasi Uashingtoni dhe Kievi shprehën mbështetjen e tyre për dialogun midis Evropës dhe presidentit rus mbi luftën në Ukrainë, sipas njerëzve të informuar mbi bisedimet.

E pyetur për gatishmërinë e saj për të marrë përsipër rolin, ish-kancelarja Merkel u përgjigj se persona të tjerë ndoshta do të ishin më të përshtatshëm, duke theksuar se Putini i merr seriozisht vetëm udhëheqësit në detyrë. I pyetur veçmas të hënën për Merkel, kancelari gjerman Friedrich Merz tha se partnerët e BE-së po diskutonin çështjen në thellësi dhe nuk pranoi të komentonte për emra individualë.

Sipas “Financial Times”, takimi i ministrave të jashtëm të BE-së do të përfshijë gjithashtu diskutime mbi atë që do të kërkonte Evropa në një marrëdhënie pas konfliktit me Rusinë, cilat do të ishin vijat e kuqe për një marrëveshje të mundshme në Ukrainë dhe cilat do të ishin parakushtet për fillimin e çdo bisede me Kremlinin.