Që nga fillimi i vitit 2026, të paktën 606 persona që tentuan të kalonin Mesdheun për të arritur në Evropë janë raportuar të vdekur ose të zhdukur, duke e bërë këtë periudhë fillestare të vitit më tragjiken në më shumë se dhjetë vjet, sipas të dhënave të agjencisë së OKB-së për migracionin.
Bilanci përfshin edhe një incident të ndodhur pranë brigjeve greke, ku rreth 30 persona dyshohet se humbën jetën ose rezultojnë të zhdukur pasi mjeti lundrues me të cilin udhëtonin u përmbys për shkak të motit të rënduar. Autoritetet arritën të shpëtonin 20 persona, mes tyre katër fëmijë, ndërsa u gjetën trupat e katër viktimave – tre burra dhe një grua, njoftoi Organizata Ndërkombëtare për Migracionin (IOM).
Sipas informacioneve, varka ishte nisur nga Tobruku në Libi më 19 shkurt dhe u përmbys rreth 37 kilometra në jug të zonës së Kali Limenes në ishullin e Kretës.
IOM thekson se niveli i humbjeve njerëzore në këtë fazë të vitit është më i larti që prej vitit 2014, kur organizata nisi regjistrimin sistematik të viktimave në këtë rrugë migratore.
Ndërkohë, në Itali, gjatë javës së fundit janë gjetur në brigjet e Kalabrisë dhe Siçilisë trupat e 15 personave, që dyshohet se ishin pjesë e grupeve të mëdha të emigrantëve të zhdukur gjatë stuhive të forta që goditën Mesdheun në janar, gjatë kalimit të rrezikshëm nga Afrika e Veriut.