Autoritetet franceze kanë vendosur pjesën më të madhe të vendit, përfshirë edhe Paris, nën alarm të kuq për shkak të temperaturave ekstreme që po godasin Evropën Perëndimore.
Në kuadër të masave emergjente, qeveria franceze ka ndaluar konsumimin e alkoolit në hapësirat publike gjatë Fête de la Musique, një nga aktivitetet kulturore më të mëdha në vend. Sipas autoriteteve, vendimi synon të ulë ngarkesën mbi urgjencat spitalore dhe ekipet mjekësore, të cilat po përballen me raste të shumta të shkaktuara nga temperaturat e larta.
Temperaturat kanë arritur deri në 40 gradë Celsius në Bordeaux, ndërsa meteorologët paralajmërojnë se kulmi i valës së të nxehtit pritet të regjistrohet gjatë ditës së hënë. Aktualisht, 49 rajone franceze ndodhen nën alarm të kuq, ndërsa pjesa tjetër e territorit mbetet kryesisht nën alarm portokalli.
Për shkak të kushteve ekstreme atmosferike, rreth 850 shkolla janë mbyllur përkohësisht, ndërsa mbi 1,500 të tjera kanë reduktuar orarin mësimor duke lejuar largimin më herët të nxënësve. Vala e të nxehtit ka sjellë gjithashtu probleme në transportin publik dhe anulimin e disa linjave hekurudhore.
Sipas shërbimit meteorologjik Météo-France, masat e ajrit të nxehtë që vijnë nga shkretëtira e Saharasë kanë krijuar një “kupolë nxehtësie” mbi Evropën Perëndimore dhe Qendrore, duke përkeqësuar situatën klimatike në rajon.
Për të ndihmuar qytetarët dhe turistët të përballojnë temperaturat e larta, bashkia e Paris ka vendosur që parqet dhe kopshtet publike të qëndrojnë të hapura edhe gjatë natës.
Ndërkohë, alarmi për temperatura ekstreme është përhapur edhe në vende të tjera evropiane. Italia ka shpallur alarm të kuq në tetë qytete të mëdha, ndërsa Spanja ka lëshuar paralajmërime për temperatura që pritet të arrijnë deri në 40 gradë Celsius në disa rajone të vendit.