Franca po planifikon një zgjerim të ndjeshëm të kapaciteteve të saj ushtarake, duke synuar rritjen e rezervave të dronëve kamikazë dhe raketave në kuadër të përgatitjeve për një “ekonomi lufte”.
Sipas një raportimi të Politico, që i referohet një projektligji për planifikimin ushtarak, qeveria franceze pritet të paraqesë javën e ardhshme një dokument strategjik që parashikon rritje të ndjeshme të stokut të municioneve deri në vitin 2030.
Dokumenti 64-faqësh thekson se prioriteti nuk do të jetë zgjerimi i trupave, por forcimi i rezervave të armëve, duke reflektuar mësimet e nxjerra nga konfliktet në Ukrainë dhe Lindjen e Mesme, të cilat kanë konsumuar me ritme të larta arsenalet perëndimore.
Në këtë kuadër:
- Rezervat e dronëve kamikazë parashikohet të rriten me 400%
- Bombat e drejtuara AASM Hammer, të prodhuara nga Safran, me 240%
- Raketat Aster dhe Mica me 30%
Projektligji synon gjithashtu të kanalizojë investime drejt rritjes së kapaciteteve prodhuese, në funksion të përgatitjes për një ekonomi të orientuar nga lufta.
Nga ana financiare, buxheti i mbrojtjes pritet të rritet nga 63.3 miliardë euro në vitin 2027 në 76.3 miliardë euro deri në vitin 2030, megjithëse këto shifra do të kërkojnë miratim vjetor nga parlamenti francez.
Ndërkohë, Parisi nuk planifikon të rrisë numrin e forcave të armatosura apo të investojë në blerje të mëdha si avionët Dassault Rafale apo fregata të reja. Gjithashtu, projekti Eurodrone, një bashkëpunim me Gjermaninë, Italinë dhe Spanjën, mbetet për momentin pa financim të dedikuar.
Megjithatë, Franca po shqyrton zhvillimin e një tanku të ri që do të zëvendësojë modelin aktual Leclerc tank, në shërbim që nga viti 1992.
Ky plan lidhet me strategjinë afatgjatë të presidentit Emmanuel Macron për të rritur autonominë strategjike të Evropës dhe për të reduktuar varësinë nga fuqitë e mëdha si SHBA dhe Kina.