Britania e Madhe do të ofrojë një paketë të re financimi deri në 23 milionë euro për të ndihmuar në ndalimin e përhapjes së epidemisë së Ebolës në lindje të Republikës Demokratike të Kongos. Lajmi u bë i ditur nga Ministria e Jashtme britanike.
Sipas të dhënave të publikuara deri të mërkurën, në Kongo janë regjistruar rreth 600 raste të dyshuara me Ebola dhe 139 viktima të dyshuara. Nga këto, 51 raste janë konfirmuar përmes analizave laboratorike, ndërsa dy raste të tjera janë konfirmuar në Ugandën fqinje.
Organizata Botërore e Shëndetësisë paralajmëron se virusi pritet të vazhdojë të përhapet, duke rritur shqetësimet për një krizë më të gjerë shëndetësore në rajon.
Sipas autoriteteve britanike, fondet do të përdoren për të mbështetur OBSH-në, agjencitë e Kombeve të Bashkuara dhe organizatat humanitare në terren.
Ndihma synon forcimin e mbikëqyrjes epidemiologjike, mbrojtjen e personelit shëndetësor në vijën e parë dhe përmirësimin e masave për parandalimin dhe kontrollin e infeksionit.