Gjermania ka testuar me sukses raketën balistike izraelite LORA, në një zhvillim që vjen në një moment të tensionuar mes Berlinit dhe Moskës.
Testi u zhvillua në Atlantikun e Veriut dhe u krye me një sistem të prodhuar nga kompania izraelite Israel Aerospace Industries. Raketa ka rreze veprimi deri në 500 kilometra.
Testimi erdhi vetëm disa orë pasi Gjermania akuzoi Rusinë për një sulm të dyshuar me dron pranë aeroportit Leipzig/Halle dhe paralajmëroi masa ndaj Moskës.
Gjermania aktualisht nuk ka raketa balistike të këtij lloji dhe po shqyrton forcimin e kapaciteteve të saj për goditje në distanca të gjata.
Shefi i Marinës gjermane, Jan Christian Kaack, e cilësoi testimin të suksesshëm, duke thënë se ai hap një kapitull të ri për mbrojtjen dhe parandalimin ushtarak të Gjermanisë dhe aleatëve të saj.
Paralelisht, Berlini po modernizon edhe raketat Taurus, ndërsa versioni i ri Taurus NEO pritet të hyjë në prodhim nga viti 2029.
Testimi i LORA-s tregon përpjekjet e Gjermanisë për të rritur ndjeshëm kapacitetet e saj ushtarake me rreze të gjatë, në një kohë kur shqetësimet për kërcënimin rus janë shtuar në Evropë.