Një ngjarje e rëndë ka tronditur shtetin e Kentuckyt në SHBA, ku një grua 49-vjeçare është arrestuar pasi dy fëmijë shumë të vegjël u dërguan në spital me dëmtime serioze, që sipas policisë rrezikonin jetën e tyre. Alarmi u dha kur një fëmijë dy vjeç u transportua me urgjencë drejt spitalit në gjendje kritike. Fëmija u dërgua me automjet privat dhe jo përmes shërbimit të emergjencës, ndërsa mjekët arritën ta stabilizonin para se ta transferonin në një spital tjetër në qendër të Louisville.
Gjatë kontrollit të situatës, hetuesit shkuan në një banesë në zonën Valley Station për të verifikuar gjendjen e fëmijëve të tjerë. Aty u gjet edhe një fëmijë njëvjeçar, i cili sipas autoriteteve paraqiste shenja të qarta dëmtimi dhe u dërgua menjëherë në spital.
Pas hetimeve fillestare, policia njoftoi se Yvonne Shanks, gjyshja e fëmijëve, është arrestuar dhe përballet me disa akuza penale, përfshirë abuzim kriminal ndaj fëmijëve, dhunë dhe rrezikim të jetës së të miturve. Ajo u paraqit në gjykatë dhe po mbahet me një garanci financiare prej 250 mijë dollarësh, ndërsa një urdhër gjykate i ndalon çdo kontakt me fëmijë të mitur.
Ndërkohë, edhe prindërit e fëmijëve, Nicholas Shanks dhe Shelby Kuntz, janë ndaluar më herët nga policia e Louisville-it. Sipas dokumenteve zyrtare, ata kanë deklaruar se ishin kujdestarët e vetëm të fëmijëve.
Autoritetet amerikane bëjnë me dije se hetimet po vazhdojnë, ndërsa fëmijët ndodhen nën kujdes mjekësor dhe shërbimeve sociale.
