Muzeu i Luvrit në Paris është mbyllur përkohësisht pas një grabitjeje të ndodhur në ambientet e tij, konfirmoi ministrja franceze e Kulturës, Rachida Dati. Në një njoftim zyrtar në platformën X, drejtuesit e muzeut thanë se mbyllja u bë për “arsye të jashtëzakonshme”.
Ministrja Dati, e cila mbërriti menjëherë në vendngjarje, deklaroi se ngjarja përfshinte vjedhjen e disa objekteve të çmuara, por pa asnjë person të lënduar. Në vend ishin të pranishëm stafi i muzeut dhe forcat e policisë, që po hetojnë rrethanat e incidentit.
Sipas raportimeve të mediave ndërkombëtare, autorët e maskuar hynë në ndërtesë nga ana e lumit Senë, duke shfrytëzuar një zonë ku po kryheshin punime ndërtimi. Ata thyen një dritare dhe dy prej tyre arritën të depërtonin në Galerinë Apollo, ku ndodhen disa nga veprat më të çmuara të artit dhe bizhuterive perandorake.
Grabitësit morën nëntë bizhuteri të rralla nga koleksioni i Napoleonit dhe i Perandoreshës së Francës, përfshirë një gjerdan, një brosh dhe një diademë me vlerë të jashtëzakonshme historike. Pas grabitjes, ata u larguan me një skuter TMax, duke u zhdukur me shpejtësi në drejtim të autostradës A6.
Autoritetet franceze kanë nisur një operacion të gjerë kërkimi, ndërsa Luvri do të qëndrojë i mbyllur deri në përfundimin e hetimeve.