Pesë persona janë arrestuar mbrëmjen e djeshme rreth orës 8 të mbrëmjes në arondissementin e 16-të të Parisit, në kuadër të një hetimi për vjedhjen spektakolare që ndodhi në Muzeun e Luvrit 11 ditë më parë. Sipas Le Figaro-s, të pestë të arrestuarit janë aktualisht në paraburgim, përfshirë një nga të dyshuarit kryesorë në këtë grabitje.
Një burim policor tha se njëri nga të dyshuarit, një shtetas algjerian 34-vjeçar, ishte arrestuar më 25 tetor në aeroportin Roissy-Charles de Gaulle, pak para se të nisej për në Algjeri pa një biletë vajtje-ardhje. Një tjetër i dyshuar, një burrë 39-vjeçar, u kap pak më vonë, pranë shtëpisë së tij në Aubervilliers, një periferi e Parisit.
Vjedhja në Muzeun e Luvrit, që ndodhi më 19 tetor, kishte një vlerë totale prej 88 milionë euro (76 milionë paund; 102 milionë dollarë), ku katër hajdutë hynë në muze në mes të ditës dhe vodhën bizhuteri të çmuara. Bizhutë ende nuk janë gjetur, dhe hetimet po vazhdojnë për të zbardhur plotësisht këtë ngjarje, ndërkohë që dyshohet se banda e përfshirë mund të jetë më e madhe se katër personat që janë kapur nga kamerat e sigurisë.
Zyra e Prokurorisë, nën drejtimin e Laure Beccuau, ka konfirmuar se hetimet janë duke u zgjeruar për të zbuluar të gjithë rrjetin e përfshirë në këtë vjedhje të nivelit të lartë.