Ministri i Jashtëm danez, Lars Løkke Rasmussen, ka ndjekur një qasje të pazakontë për t’u afruar njerëzve që postojnë komente armiqësore kundër tij në internet.
Rreth dy javë më parë, ish-kryeministri dhe udhëheqësi aktual i Partisë së Moderuar, krijoi një grup në Facebook për ata që e urrejnë, një grup i titulluar: “Të gjithë ne që urrejmë Lars Løkke” (Alle os der hader Lars Løkke).
Në një postim mbrëmë, Rasmussen i ftoi kritikët e tij që i janë bashkuar grupit të urrejtësve në një takim privat. Grupi aktualisht ka rreth 440 anëtarë.
“Ju shkruani këtu me zell, kështu që le të takohemi vërtet. Gjeta një dhomë dhe vendosanjë btavolinë. Kjo do të thotë që mund të vini dhe të më tregoni pse më urreni. Premtoj t’ju dëgjoj. Do të shohim nëse një ndryshim në mendime mund të shndërrohet në një diskutim”-, shkroi ai.
Takimi është planifikuar të zhvillohet në një vend në qendër të Kopenhagenit të shtunën në mbrëmje. Lokke është një nga politikanët më të shquar të Danimarkës dhe ka qenë shënjestër e kritikave për profilin e tij të lartë.
Politikani liberal shërbeu si kryeministër nga viti 2009 deri në vitin 2011 dhe përsëri nga viti 2015 deri në vitin 2019. Që nga fundi i vitit 2022, ai ka shërbyer si ministër i Jashtëm nën kryeministren socialdemokrate Mette Frederiksen.
Zgjedhjet lokale do të mbahen në Danimarkë të martën e ardhshme. Do të jetë hera e parë që të Moderuarit e Lokke Rasmussen do të marrin pjesë në zgjedhje lokale dhe rajonale që nga themelimi i partisë në vitin 2022.
