Dy raste të reja të dyshuara me hantavirus janë raportuar këtë të premte në Spanjë dhe në Tristan da Cunha, duke shtuar shqetësimet për shpërthimin e virusit që nisi në bordin e anijes turistike MV Hondius.
Megjithatë, Organizata Botërore e Shëndetësisë vijon të këmbëngulë se rreziku për popullatën e gjerë mbetet i ulët dhe se virusi nuk transmetohet lehtësisht nga njeriu te njeriu.
Autoritetet shëndetësore në Alicante kanë bërë me dije se një grua 32-vjeçare po testohet për hantavirus, pasi ka shfaqur simptoma të ngjashme me infeksionin.
Sipas zyrtarëve spanjollë, ajo kishte udhëtuar në avion pranë një gruaje holandeze që ishte infektuar në bordin e MV Hondius. Gruaja holandeze kishte zbritur nga fluturimi në Johannesburg më 25 prill pasi ishte ndier keq dhe më pas humbi jetën në spital.
Një tjetër rast i dyshuar është raportuar në ishullin e largët britanik Tristan da Cunha, ku një shtetas britanik dyshohet se është infektuar pas ndalesës së anijes turistike në ishull gjatë muajit prill.
Agjencia e Sigurisë Shëndetësore e Mbretërisë së Bashkuar konfirmoi se personi i dyshuar kishte qenë pasagjer në anijen me flamur holandez.
Ekspertja e OBSH-së, Anais Legand, deklaroi se bazuar në mënyrën e përhapjes së rasteve në anije dhe mes pasagjerëve që kanë zbritur, rreziku për publikun e përgjithshëm vazhdon të konsiderohet i ulët.
Sipas OBSH-së, disa prej rasteve në anije janë shkaktuar nga hantavirusi i Andeve, i vetmi variant që mund të transmetohet nga njeriu te njeriu, zakonisht përmes kontaktit të ngushtë dhe të zgjatur me persona simptomatikë.
Anija turistike ishte nisur nga Argjentina në muajin mars me rreth 150 pasagjerë dhe kishte ndaluar në Antarktida dhe destinacione të tjera përpara se të vazhdonte drejt ujërave pranë Kepi i Gjelbër.
Deri tani, tre persona një çift holandez dhe një shtetas gjerman kanë humbur jetën pas shpërthimit të virusit në bord.