Një gropë e madhe u hap papritur në vrimën e 13-të të Davyhulme Park Golf Club në Trafford, Greater Manchester, duke zbuluar një bodrum vere të fshehur prej rreth 200 vitesh. Zbulimi u bë nga kujdestari i fushës, Steve Hopkins, i cili mbeti i habitur kur pa hapjen në tokë. Ndërsa gërmimet vazhduan, u shfaq një hapësirë e harkuar me tulla që të çonte në një dhomë nëntokësore të mbushur me dhjetëra shishe vere, shampanje dhe porti, të gjitha të zbrazëta.
Vrima e 13-të mban emrin Cellars, një detaj që sugjeron se historia e vendit nuk ishte harruar plotësisht, edhe pse ishte vulosur prej vitesh. Profesionisti i klubit, Martyn Hamer, tha se fillimisht panë shishet gjatë gërmimit dhe kuptuan se dikur aty ishte zhvilluar një festë e mirë.
Bodrumi me tulla daton nga koha e Davyhulme Hall, një rezidencë e shekullit XIX e cila u shkatërrua në vitin 1888 pasi nuk u gjet blerës. Sipas historianëve, nuk përjashtohet mundësia që shishet të jenë konsumuar gjatë periudhës së prishjes së ndërtesës.
Klubi i golfit konsiderohet si një nga më të vjetrit në Angli, me origjinë që daton në vitet 1860. Drejtuesit e klubit kanë konfirmuar se bodrumi është mbyllur përkohësisht dhe shishet janë hequr për ruajtje, ndërsa po shqyrtohet mundësia që hapësira të shndërrohet në një element të veçantë historik brenda fushës.