Kryeministri izraelit Benjamin Netanyahu është helmuar nga ushqimi. Lajmin e konfirmoi vetë zyra e kryeministrit. Gazeta Times of Israel raporton se Netanyahu nuk mori pjesë në mbledhjen javore të kabinetit këtë mëngjes dhe do të punojë nga shtëpia për tre ditët e ardhshme.
Netanyahu filloi të ndihej keq gjatë natës dhe u ekzaminua në shtëpinë e tij nga Dr. Alon Hersko, drejtor i departamentit të mjekësisë së brendshme në Spitalin Universitar Hadassah Ein Kerem. Hersko e diagnostikoi kryeministrin me inflamacion të zorrëve të shkaktuar nga ngrënia e ushqimit të prishur.
Gjendja e Netanyahut u vlerësua e mirë pas testeve të mëtejshme, sipas zyrës së tij, e cila shtoi se atij po i jepen lëngje intravenoze për shkak të dehidrimit të shkaktuar nga sëmundja. Netanyahu 75-vjeçar është përballur me probleme shëndetësore vitet e fundit dhe në vitin 2023, ai iu nënshtrua një operacioni për të instaluar një stimulues kardiak pasi pësoi një bllok të përkohshëm të zemrës.