Presidenti i SHBA-së, Donald Trump, ka publikuar një video që sipas tij tregon shkatërrimin e një ure të madhe në Iran, në një moment kur tensionet në rajon po rriten ndjeshëm. Materiali u shpërnda në platformën Truth Social, ku Trump iu referua “urës më të madhe në Iran” si objektiv i një sulmi me bombë. Në të njëjtin postim, ai i dërgoi një mesazh të fortë Teheranit, duke kërkuar që të ecë menjëherë drejt një marrëveshjeje “para se të jetë tepër vonë”.
Ndërkohë, mediat shtetërore iraniane raportuan se të paktën tetë persona humbën jetën dhe 95 të tjerë u plagosën pas një shpërthimi në një urë në autostradën që lidh Tehran me Karaj, në pjesën perëndimore të vendit. Sipas agjencisë së lajmeve Fars News Agency dhe televizionit shtetëror iranian, informacioni u konfirmua nga zëvendësguvernatori i provincës Alborz, Qodratollah Seif. Në reagimin e tij, Trump paralajmëroi për sulme të tjera të mundshme ndaj infrastrukturës kritike iraniane, përfshirë ura dhe termocentrale, duke deklaruar se ushtria amerikane “as nuk ka filluar” përdorimin e plotë të kapaciteteve të saj ushtarake.
Ai shtoi se udhëheqja iraniane duhet të veprojë menjëherë, duke theksuar se “e di çfarë duhet bërë dhe duhet bërë shpejt”, një deklaratë që shihet si sinjal për një përshkallëzim të mundshëm nëse nuk arrihet një marrëveshje në kohë.