Një ngjarje e rëndë ka ndodhur në Greqi, teksa policia arrestoi një person që kishte mbajtur trupin e vdekur të babait të tij në frigorifer me qëllim që të përfitonte ende pensionin. Ngjarja ndodhi në Mystra dhe ka tronditur opinionin.
Trupi i 90-vjeçarit u gjet brenda një frigoriferi komercial. E gjitha filloi kur autoritetet morën informacion për mungesën e të moshuarit, duke rezultuar në një hetim policor. Si pjesë e hetimit, djali i tij 55-vjeçar u thirr për të dhënë shpjegime, ndërsa policia më pas zbuloi trupin e 90-vjeçarit brenda një frigoriferi në bodrum.
Në vendngjarje shkoi një patolog mjeko-ligjor, i cili, sipas autopsisë së parë, nuk gjeti shenja të dukshme lëndimi në trup. Shkaqet e sakta të vdekjes pritet të sqarohen pas një autopsie-nekropsie. 55-vjeçari u arrestua dhe sipas informacioneve, dyshohet se i ka thënë policisë se babai i tij kishte vdekur nga shkaqe natyrore. Siç pretendoi ai, e vendosi trupin në frigorifer për të vazhduar të merrte pensionin e të ndjerit.