James Broadnax, 37 vjeç, u ekzekutua të enjten në mbrëmje në burgun shtetëror në Huntsville, pasi u shpall fajtor për vrasjen e dy burrave në vitin 2008 jashtë një studioje muzikore në periferi të Dallasit.
Para ekzekutimit, gruaja e tij britanike, Tiana Krasniqi, 31 vjeç, bërtiti “Të dua” dhe u hodh kundër dritares së dhomës së vdekjes, duke u ndihmuar më pas nga stafi i burgut.
Broadnax u martua me Tianën vetëm disa ditë para ekzekutimit, pas një lidhjeje që nisi në vitin 2024 gjatë një projekti të saj për të studiuar pabarazitë racore në sistemin amerikan të drejtësisë. Çifti kaloi 90 ditë së bashku para ceremonisë së shkurtër 20-minutëshe të martesës në burgun e Polunsky.
Në fjalën e tij përfundimtare, Broadnax kërkoi falje nga familjet e viktimave dhe insistoi se ishte i pafajshëm, duke kritikuar trajtimin e tij gjatë hetimeve dhe gjyqit, përfshirë përdorimin e teksteve të këngëve të tij si prova për të justifikuar dënimin me vdekje.
Pas ekzekutimit, Tiana postoi në TikTok: “Ata vranë burrin tim”, duke dëshmuar dhimbjen e saj për mënyrën se si Broadnax përjetoi injeksionin vdekjeprurës. Ajo ka kërkuar vazhdimisht rivlerësim të rasteve të dënimit me vdekje dhe ka denoncuar shkelje gjatë hetimeve dhe gjykimit të burrit të saj.