Autoritetet në Charlotte, North Carolina | Charlotte kanë bërë me dije se procesi gjyqësor ndaj 35-vjeçarit DeCarlos Brown Jr. është pezulluar pasi ai është shpallur mendërisht i paaftë për t’u gjykuar.
Sipas një raporti psikiatrik të përfshirë në dosje, Brown nuk është aktualisht në gjendje të kuptojë procedurat ligjore dhe as të marrë pjesë në procesin gjyqësor. Për këtë arsye, gjykata ka vendosur që çështja të mos vazhdojë derisa të vlerësohet nëse gjendja e tij mendore mund të përmirësohet përmes trajtimit.
Ai përballet me akuza për vrasje të shkallës së parë në nivel shtetëror, si edhe me akuza federale për vrasje në transport publik. Sipas raportimeve të mediave, për këto akuza prokuroria federale mund të kërkojë edhe dënimin me vdekje në rast shpalljeje faji.
Sipas materialeve të çështjes të cituara nga The New York Times, Brown ka pasur historik të gjatë me probleme të rënda të shëndetit mendor dhe kontakte të përsëritura me autoritetet dhe institucionet shëndetësore ndër vite. Ai më herët është përballur edhe me dënime për vepra penale, përfshirë grabitje të armatosur.
Rasti ka të bëjë me vdekjen e 23-vjeçares ukrainase Irina Zarutska, e cila kishte emigruar në Shtetet e Bashkuara së bashku me familjen e saj për t’i shpëtuar luftës në Ukrainë dhe për të nisur një jetë të re. Ajo u vra në gusht të vitit 2025 në një incident në transport publik, ngjarje që shkaktoi reagim të gjerë në opinionin amerikan.
Çështja mbetet e hapur ligjërisht, por aktualisht është e ngrirë deri në një vendim të ri të gjykatës për aftësinë mendore të të akuzuarit.