Autori i dyshuar i të shtënave gjatë darkës së korrespondentëve të Shtëpisë së Bardhë, në prani të presidentit Donald Trump, është identifikuar si Cole Thomas Allen, një mësues 31-vjeçar nga Torrance California.
Sipas burimeve mediatike ndërkombëtare, Allen aktualisht ndodhet në paraburgim dhe pritet të paraqitet për herë të parë para gjykatës më 27 prill. Autoritetet amerikane vijojnë hetimet për të zbardhur plotësisht rrethanat dhe motivet e ngjarjes.
I dyshuari ka studiuar inxhinieri dhe është i diplomuar në California Institute of Technology, i njohur si Caltech, sipas materialeve të siguruara nga CNN.
Ndërkohë presidenti Trump e ka përshkruar të dyshuarin si “një person të sëmurë”, duke theksuar se ai ishte i armatosur me disa armë.
“Personi është arrestuar. Ata po shkojnë në apartamentin e tij. Mendoj se jeton në Kaliforni, dhe është një person i sëmurë, shumë i sëmurë, dhe ne nuk duam që gjëra të tilla të ndodhin,” tha presidenti amerikan pasi u shoqërua jashtë skenës gjatë incidentit.
Ndërkohë, kryetarja e bashkisë së Washington DC, Muriel Bowser, bëri të ditur se i dyshuari kishte në zotërim armë zjarri dhe mjete prerëse, si dhe dyshohet se ka vepruar i vetëm.
