Donald Trump, në intervistën e tij të parë si presidenti i 47-të, u shfaq në programin e Sean Hannity në Fox News, ku foli për kthimin e tij në Shtëpinë e Bardhë dhe kritikoi ashpër administratën Biden.
“Rikthimi im dëshmon se politikat dhe filozofitë e ‘të majtës radikale’ gjatë katër viteve të fundit janë të tmerrshme dhe mos punë,” deklaroi Trump. Ai shtoi se ndarja e dy mandateve të tij jo të njëpasnjëshme e bën këtë moment edhe më të veçantë. “Mendoj se arritëm në kohën e duhur,” tha ai.
Trump kritikoi administratën e Biden për inflacionin, tërheqjen nga Afganistani dhe konfliktet si lufta Rusi-Ukrainë dhe Izrael-Hamas. Sipas tij, këto janë probleme që mund të rregullohen, por kërkojnë kohë dhe përpjekje. “Ne mund ta kthejmë vendin tonë, por nëse nuk e fitonim këtë garë, besoj se vendi ynë do të kishte humbur përgjithmonë,” theksoi ai.
Gjatë intervistës, Trump iu referua edhe faljeve të fundit të dhëna nga Presidenti Biden për anëtarët e familjes së tij. Duke e quajtur këtë veprim të paprecedent, Trump tha: “Ky djalosh shkoi duke i falur të gjithë… por nuk i fali vetes. Dhe, e dini, gjithçka kishte të bënte me të.”
Biden, gjatë një interviste në vitin 2020, kishte kritikuar idenë e faljeve parandaluese nga Trump për familjen e tij, duke e quajtur një precedent të rrezikshëm. Megjithatë, katër vjet më vonë, Biden fali motrën, dy vëllezërit dhe bashkëshortët e tyre, duke thënë se kjo ishte për të mbrojtur familjen nga hetimet “e motivuara politikisht” nga administrata Trump.
I pyetur nëse Kongresi duhet të hetojë familjen Biden, Trump shmangu një përgjigje të drejtpërdrejtë, duke komentuar: “Shikoni, ai nuk ia fali vetes dhe nuk u fali disa njerëzve të tjerë që kishin nevojë.”
Trump përfundoi intervistën me një ton optimist, duke u shprehur se ka besim në të ardhmen e vendit dhe se problemet ekzistuese mund të adresohen me lidershipin e duhur.