Bilanci trevjeçar i Prokurorisë së Barit dhe Guardia di Finanza-s dokumenton mbi 355 milionë euro pasuri të sekuestruara. Dy hetime të rëndësishme të DIA-s me autoritetet shqiptare tregojnë se gjurmët e trafikut të drogës dhe parave kalojnë në të dyja anët e Adriatikut.

Mbi 355 milionë euro pasuri janë sekuestruar në periudhën gusht 2023–gusht 2026 nga autoritetet e Barit, në kuadër të hetimeve paraprake dhe procedurave të parandalimit. Bilanci trevjeçar u publikua më 2 shtator 2026 nga Prokuroria e Republikës së Barit dhe Guardia di Finanza.

Sipas raportit, 162.4 milionë euro lidhen me mashtrime fiskale dhe dëmtim të financave publike, përfshirë evazionin e TVSH-së, përdorimin e parregullt të kredive tatimore dhe mashtrimet me bonuset e ndërtimit. Rreth 19.7 milionë euro janë sekuestruar në hetime për krime ekonomike e financiare dhe vepra kundër administratës publike, ndërsa më shumë se 152 milionë euro lidhen me masa reale të sigurimit në kuadër të hetimeve për kriminalitet të organizuar.

Në këtë bilanc përfshihen edhe mbi 21 milionë euro në masa për mbrojtjen e tregut dhe konsumatorëve, përfshirë hetime për mashtrime tregtare dhe falsifikim.

Një nga goditjet më të mëdha të periudhës është operacioni “Mercato”, i vitit 2026, ku u morën masa personale ndaj 23 personave dhe masa reale ndaj 79 subjekteve. Vlera e pasurive të sekuestruara kaloi 63 milionë euro. Sipas hipotezës hetimore, një organizim kriminal kishte krijuar një pozitë dominuese në sektorin e lojërave dhe basteve dhe kishte përdorur aktivitetin për riciklimin e të ardhurave të paligjshme.

Raporti i Prokurorisë së Barit nuk e ndan shumën prej 355 milionë eurosh sipas shtetësisë së personave nën hetim apo origjinës së kapitalit. Shifra përfshin hetime të shumta të zhvilluara në territorin italian, por në disa prej tyre gjurma e veprimtarisë kriminale shtrihet përtej kufijve.

Një nga drejtimet më të rëndësishme është Shqipëria.

Operacioni “URA”

Në maj 2025, DIA e Barit, në bashkëpunim me DDA-n e Barit, SPAK-un dhe autoritetet shqiptare, zhvilloi operacionin “URA”, një hetim ndërkombëtar për trafik droge dhe riciklim parash.

Operacioni çoi në masa ndaj 52 personave, 40 shqiptarë dhe 12 italianë, si dhe në sekuestrime pasurore në Itali dhe Shqipëri. Hetimi u koordinua me Eurojust-in dhe përfshiu një Ekip të Përbashkët Hetimor mes autoriteteve italiane dhe shqiptare.

Sipas DIA-s, hetimi dokumentoi një rrjet që lidhte Ballkanin, Puglian, Evropën Veriore dhe Amerikën e Jugut. U dokumentua trafikimi i 255 kilogramëve heroinë dhe kokainë të pastër, me ngarkesa që mbërrinin kryesisht nga Shqipëria dhe Evropa Veriore drejt Barit. E elementi më i rëndësishëm për gjurmën financiare ishte drejtimi i kundërt.

Hetuesit dokumentuan një fluks të vazhdueshëm parash cash nga Puglia drejt Shqipërisë, si pagesë për drogën e trafikuar me shumicë. Sipas DIA-s, transaksionet arrinin në 4.5 milionë euro dhe, në disa raste, paratë transportoheshin përmes shoferëve të autobusëve të linjave ndërkombëtare.

Në të njëjtin hetim u dokumentuan pagesa cash në Bari me vlera mbi 500 mijë euro, ndërsa më shumë se 500 mijë dollarë u transferuan nga Shqipëria drejt Amerikës Latine si parapagim për një ngarkesë prej 500 kilogramësh kokainë nga Ekuadori.

Operacioni i majit 2026: 680 mijë euro të kapura në Murriqan

Një vit më pas, më 26 maj 2026, DIA e Barit dhe autoritetet shqiptare zhvilluan një tjetër operacion të rëndësishëm ndërkufitar.

Hetimi, i zhvilluar nga DIA e Barit dhe DDA e Barit në bashkëpunim me SPAK-un dhe autoritetet shqiptare, u koordinua përmes një Ekipi të Përbashkët Hetimor me Eurojust-in. Në total u ekzekutuan masa ndaj 15 personave në Itali dhe Shqipëri. Hetimi lidhej me vrasjen e Francesco Diviestit në Canosa di Puglia, por në të njëjtën kohë nxori në pah një grup të dyshuar për riciklim ndërkombëtar të parave cash nga Italia drejt Shqipërisë.

Sipas DIA-s, ky grup ishte pjesë e një aktiviteti kriminal më të gjerë të hetuar prej vitesh nga autoritetet italiane dhe shqiptare lidhur me trafikun ndërkombëtar të kokainës dhe heroinës nga Shqipëria drejt Puglias.

Një episod konkret i hetimit është veçanërisht domethënës: më 14 nëntor 2024, autoritetet shqiptare sekuestruan 680 mijë euro cash në pikën kufitare të Murriqanit, pas një sinjalizimi të dhënë nga Qendra Operative e DIA-s në Bari. Sipas hetimit, paratë ishin pjesë e fluksit të të ardhurave nga shitja me shumicë e drogës në Itali drejt Shqipërisë.

Hetimi i vitit 2026 lidhet edhe me një seri operacionesh të mëparshme të DIA-s së Barit dhe SPAK-ut, ndër to “Shefi”, “Kulmi”, “Shpirti” dhe “URA”. Sipas DIA-s, këto hetime kanë çuar ndër vite në 170 masa sigurimi në Itali, Shqipëri dhe vende të tjera evropiane, në sekuestrimin e pasurive me vlerë disa milionë euro dhe në kapjen e më shumë se shtatë tonëve drogë.

Në njërin drejtim, droga e trafikuar nga Shqipëria dhe Ballkani mbërrin në Puglia. Në drejtimin tjetër, pagesat e lidhura me këtë aktivitet kriminal lëvizin nga Italia drejt Shqipërisë, shpesh në formë cash.

Bilanci prej mbi 355 milionë eurosh i Prokurorisë së Barit përfshin qindra hetime për lloje të ndryshme kriminaliteti dhe pjesa më e madhe e procedimeve lidhet me aktivitetin në Itali.

Por operacionet “URA” dhe hetimi i majit 2026 japin një dimension tjetër të rëndësishëm: kur hetuesit ndjekin paranë, kufiri mes Italisë dhe Shqipërisë nuk është domosdoshmërisht pika ku përfundon hetimi.

Në rastet e dokumentuara nga DIA, gjurma financiare kalon Adriatikun. Paratë e krijuara nga trafiku i drogës në Itali ndiqen drejt Shqipërisë. Bilanci i Barit tregon shkallën e goditjes financiare ndaj pasurive të dyshuara si të paligjshme. Hetimet me Shqipërinë tregojnë ndërkohë se një pjesë e këtyre veprimtarive kriminale ka një shtrirje që tejkalon territorin italian dhe kërkon bashkëpunim të drejtpërdrejtë në të dyja anët e Adriatikut.

Prokuroria e Barit dhe Guardia di Finanza kanë saktësuar se një pjesë e procedimeve të përfshira në bilanc ndodhen ende në fazën e hetimeve paraprake. Masat e sekuestrimit janë të përkohshme dhe nuk përbëjnë vendim përfundimtar mbi përgjegjësinë penale. Për personat nën hetim vlen prezumimi i pafajësisë deri në një vendim të formës së prerë.