Forcat izraelite kanë ndaluar 13 anije që transportonin aktivistë të huaj dhe ndihma për në Gaza.

Ndërsa 30 anije të tjera, pjesë e flotës Global Sumud Flotilla (GSF) po vazhdojnë të lundrojnë drejt enklavës palestineze të shkatërruar nga lufta.

Një pamjet e publikuara nga ministria e jashtme izraelite shihen aktivistët e ndaluar, përfshirë suedezen Greta Thunberg, të ulur në një kuvertë të rrethuar nga ushtarë.

“Disa anije të flotës Hamas-Sumud janë ndaluar në mënyrë të sigurt dhe pasagjerët po transferohen në një port izraelit”, tha ministria e jashtme izraelite në X. “Greta dhe miqtë e saj janë të sigurt dhe shëndoshë e mirë.”

Global Sumud Flotilla (GSF), që transporton ilaçe dhe ushqim në Gaza, përbëhet nga më shumë se 40 anije civile me rreth 500 parlamentarë, avokatë dhe aktivistë.

Flotilla publikoi disa video në Telegram me mesazhe nga individë në bordin e anijeve të ndryshme, disa prej të cilëve mbanin pasaportat e tyre dhe pretendonin se ishin rrëmbyer e dërguar në Izrael kundër vullnetit të tyre, dhe duke përsëritur se misioni i tyre ishte një kauzë humanitare jo e dhunshme.

Lundrimi i Global Sumud Flotilla përgjatë Detit Mesdhe tërhoqi vëmendjen ndërkombëtare, pasi vende si Turqia, Spanja dhe Italia dërguan anije apo dronë në rast se shtetasit e tyre kishin nevojë për ndihmë, edhe pse kjo shkaktoi paralajmërime të përsëritura nga Izraeli për t’u kthyer prapa.

Ministria e Jashtme e Turqisë e quajti “sulmin” e Izraelit ndaj flotës “një akt terrori” që rrezikoi jetën e civilëve të pafajshëm.

Presidenti kolumbian Gustavo Petro urdhëroi dëbimin e të gjithë delegacionit diplomatik të Izraelit të mërkurën pas ndalimit të dy kolumbianëve në Flotilla. Izraeli nuk ka pasur ambasador në Kolumbi që nga viti i kaluar.

Gustavo Petro i quajti ndalimet një “krim ndërkombëtar” nga kryeministri izraelit Benjamin Netanyahu dhe kërkoi lirimin e kolumbianëve. Ai gjithashtu i dha fund marrëveshjes së tregtisë së lirë të Kolumbisë me Izraelin.

Ndërhyrja e Izraelit ndaj Flotilla shkaktoi protesta në Itali dhe Kolumbi. Sindikatat italiane bënë thirrje për një grevë të përgjithshme të premten në solidaritet.

Marina izraelite e kishte paralajmëruar më parë flotën se po i afrohej një zone aktive luftimesh dhe po shkelte një bllokadë të ligjshme, dhe i kishte kërkuar të ndryshonin kursin. Ajo ishte ofruar të transferonte çdo ndihmë në mënyrë paqësore përmes kanaleve të sigurta në Gaza.

Flotilla është përpjekja e fundit nga deti për të thyer bllokadën e Izraelit ndaj Gazës, pjesa më e madhe e së cilës është shndërruar në një shkretëtirë nga pothuajse dy vjet luftë.

Organizatorët e flotës e denoncuan bastisjen e së mërkurës si një “krim lufte”. Ata thanë se ushtria përdori taktika agresive, përfshirë përdorimin e topave me ujë, por askush nuk u lëndua.

Anijet ishin rreth 70 milje detare larg enklavës së shkatërruar nga lufta kur u ndaluan, brenda një zone që Izraeli po e kontrollon për të ndaluar çdo anije që po afrohej.

Organizatorët thanë se komunikimet e tyre ishin të koduara, duke përfshirë edhe përdorimin e një transmetimi të drejtpërdrejtë nga kamerat e disa prej anijeve.

Sipas të dhënave të gjurmimit të anijeve të Flotilla, 13 anije janë kapur ose ndaluar që nga fillimi i së enjtes. Organizatorët kanë mbetur sfidues, duke thënë në një deklaratë se Flotilla “do të vazhdojë e padekurajuar”.

30 lundrojnë drejt Gazës, thanë organizatorët në një postim në Telegram, duke deklaruar se ishin 46 milje detare larg destinacionit të tyre.