Kryeministri i Hungari, Viktor Orbán, i ka ofruar ndihmë presidentit rus Vladimir Putin për zgjidhjen e luftës në Ukrainë, duke përfshirë edhe mundësinë e organizimit të një samiti në Budapest.
Sipas një raportimi të publikuar nga Bloomberg News, që i referohet transkriptit të një bisede telefonike mes dy liderëve, Orbán është shprehur i gatshëm të kontribuojë “në çdo mënyrë” për të lehtësuar dialogun mes palëve.
Ky zhvillim vjen në një moment politik delikat për liderin hungarez, i cili përballet me një sfidë të fortë përballë zgjedhjeve të ardhshme, ndërsa vijon të mbajë një qasje më të butë ndaj Moskës krahasuar me pjesën tjetër të Evropës.
Pavarësisht konfliktit në Ukrainë, Orbán ka ruajtur marrëdhënie të afërta me Kremlinin dhe ka theksuar shpesh rëndësinë e bashkëpunimit energjetik, duke pasur parasysh varësinë e vendit të tij nga burimet ruse të naftës dhe gazit. Ai gjithashtu ka kundërshtuar disa iniciativa të Bashkimi Evropian në mbështetje të Kievit, për shkak të mosmarrëveshjeve dypalëshe.
Në bisedën e raportuar, Orbán i drejtohet Putinit si “mik”, duke nënvizuar marrëdhënien e gjatë mes tyre që daton prej më shumë se një dekade. Nga ana tjetër, presidenti rus ka vlerësuar qëndrimin e Hungarisë, duke e cilësuar atë si më të pavarur në raport me krizën ukrainase dhe duke sugjeruar se Budapesti mund të jetë një vend i përshtatshëm për një takim të mundshëm ndërkombëtar.
Raporti thekson gjithashtu se Hungaria ka shprehur gatishmëri për të pritur një samit të tillë, pavarësisht zhvillimeve ligjore ndërkombëtare që lidhen me liderin rus. Ndërkohë, publikimi i këtij materiali vjen në vazhdën e zbulimeve të tjera mediatike që hedhin dritë mbi komunikimet mes zyrtarëve të lartë hungarezë dhe rusë lidhur me çështjet e sanksioneve dhe bashkëpunimit politik.