Presidenti amerikan Donald Trump ka deklaruar se Shtetet e Bashkuara nuk po kërkojnë një armëpushim mes Izraelit dhe Iranit, por një fund të vërtetë të luftës midis dy vendeve. “Nuk po kërkoj një armëpushim, ne po kërkojmë diçka më të mirë se një armëpushim, një fund të vërtetë të luftës”, u shpreh ai për gazetarët nga Air Force One pasi u kthye nga takimi i G7-ës në Kanada.
Në të njëjtën kohë, mediat raportojnë se Trump po shqyrton dërgimin e Steve Witkoff ose JD Vance në Teheran për t’u takuar me zyrtarë iranianë, një lëvizje që sinjalizon përpjekjet për diplomaci direkte në kulmin e përshkallëzimit të krizës. “Nëse do të jetë i dërguari për Lindjen e Mesme apo zëvendëspresidenti, do të varet nga ajo që ndodh kur të kthehem në Uashington”, tha Trump, duke theksuar se Irani duhet të heqë dorë nga armët bërthamore dhe se Izraeli nuk ka ndërmend të ndalë sulmet ndaj Iranit. Ndërkohë, situata në Iran ka marrë një tjetër goditje: një sulm i madh kibernetik ka goditur sistemin bankar të vendit, duke paralizuar të gjitha operacionet e Sepah Bank – një nga bankat më të mëdha të lidhura me Gardën Revolucionare.
Sipas Iran International, të gjitha të dhënat janë fshirë, bankomatët janë jashtë funksionit dhe qytetarët nuk mund të tërheqin para. Këto zhvillime vijnë në një kohë kur edhe pjesa perëndimore e Teheranit është raportuar nën sulm ajror nga forcat izraelite, ndërsa sistemet iraniane të mbrojtjes ajrore janë aktivizuar. Konflikti mes dy vendeve është në pikën më të nxehtë të viteve të fundit dhe çdo hap diplomatik apo ushtarak mund të jetë vendimtar për fatin e rajonit.