Bombarduesit strategjikë B-1B të Forcave Ajrore të Shteteve të Bashkuara janë parë duke fluturuar pranë brigjeve të Venezuelës për herë të dytë brenda dy javësh, në një shenjë të qartë të shtimit të presionit ushtarak ndaj regjimit të Nicolas Maduro-s.
Sipas të dhënave të monitorimit ajror në internet, dy avionë B-1 u ngritën nga baza ajrore Dyess në Texas dhe u panë duke operuar pranë kufirit ajror të Venezuelës dhe ishujve të saj në Detin e Karaibeve.
Rreth një orë e gjysmë më vonë, nga baza MacDill në Florida u nisën avionë cisternë KC-135 për mbështetje në ajër.
Fluturimet, të identifikuara me thirrjet “BARB21” dhe “BARB22”, dyshohet se janë afruar deri në 50 milje nga bregdeti venezuelian dhe shumë pranë ishujve Los Testigos.
Edhe pse të dhënat mund të mos jenë plotësisht të sakta, ato përkojnë me një seri aktivitetesh të ngjashme të Forcave Ajrore amerikane në rajon.
Vetëm një javë më parë, tre bombardues B-52 kishin kryer një mision të ngjashëm, të shoqëruar nga avionë luftarakë F-35B të Korpusit të Marinës.
Në të njëjtën kohë, janë regjistruar edhe avionë të tjerë amerikanë në zonë – përfshirë një RC-135 të dedikuar për inteligjencë dhe një E-11A “Battlefield Airborne Communications Node”, që shërben si qendër fluturuese komunikimi për operacionet e avancuara ushtarake.
Ky i fundit u pa duke u drejtuar nga Puerto Rico, ku SHBA po përqendron kapacitete të konsiderueshme ushtarake.