“Kam një problem”/ Publikohen pamjet e Sterling dhe historia bëhet më E RËNDË se një dënim!

Pamjet e publikuara pas seancës gjyqësore kanë rikthyer në qendër të vëmendjes rënien e Raheem Sterling.

Ish-ylli i Anglisë dhe i Manchester City-t shihet në momentet pas arrestimit, me bombola të oksidit të azotit mbi vete, ndërsa pamjet nga kamera e makinës tregojnë Lamborghini-n e tij duke lëvizur në mënyrë të rrezikshme mes korsive përpara aksidentit.

Ngjarja ndodhi më 28 maj, ndërsa Sterling udhëtonte në M25 dhe M3. Dëshmitarët raportuan se e kishin parë duke thithur oksid azoti nga një tullumbace ndërsa ishte në timon. Një prej tyre telefonoi policinë pasi kishte frikë se dikush mund të humbiste jetën. Më pas, Sterling humbi kontrollin dhe u përplas, por fatmirësisht nuk pati të plagosur.

Në gjykatë, 31-vjeçari u deklarua fajtor për drejtim të rrezikshëm, posedim të oksidit të azotit për përdorim të paligjshëm dhe mosdhënie të një mostre. Gjatë ndalimit, Sterling u tha punonjësve se kishte “një problem” me oksidin e azotit. Tashmë ai përballet me dënimin, që do të përcaktohet më 25 nëntor, ndërsa gjykata i ka hequr përkohësisht të drejtën për të drejtuar automjetin.

Por pas pamjeve dhe procedurave gjyqësore fshihet një histori më e madhe. Sterling nuk është thjesht një futbollist që bëri një shkelje të rëndë. Ai është një lojtar që vetëm pak vite më parë ishte një nga figurat kryesore të futbollit anglez, fitonte trofe me Manchester City-n dhe luante me Anglinë në Kupën e Botës.

Sot është pa klub, pas largimit nga Feyenoord, ndërsa vitet e fundit kanë qenë veçanërisht të vështira për karrierën e tij. Te Chelsea kaloi një periudhë të gjatë jashtë planeve të skuadrës dhe në një moment u detyrua të punonte me trajner personal për të ruajtur formën. Asgjë nga kjo nuk e justifikon rrezikimin e jetëve të të tjerëve. Përkundrazi, sjellja e tij ishte tepër serioze dhe duhet të ketë pasoja. Por pyetja që ngre kjo histori është edhe tjetër: a mjafton vetëm ndëshkimi?

Kur një futbollist pranon vetë se ka një problem me një substancë dhe në të njëjtën kohë po përjeton një rënie të fortë profesionale, ndoshta krahas dënimit duhet parë edhe mundësia për ndihmë profesionale. Sepse rasti Sterling nuk është më vetëm historia e një ish-ylli që bëri një gabim të rëndë. Është historia e një njeriu që duket se ka nevojë të ndihmohet për të kuptuar se çfarë po i ndodh, përpara se rënia të shkojë edhe më larg.