Kryeministri britanik Keir Starmer deklaroi në Parlament se Shtetet e Bashkuara kanë kërkuar leje për të përdorur bazat ushtarake britanike me qëllim ndalimin e raketave iraniane në burim, përpara se ato të lëshohen drejt objektivave në rajon. Ai tha se e ka miratuar këtë kërkesë për të parandaluar sulme të mëtejshme dhe për të mbrojtur civilët, por theksoi se Mbretëria e Bashkuar nuk po i bashkohet operacioneve ofensive të SHBA-ve dhe Izraelit kundër Iranit.
Starmer pranoi se presidenti amerikan Donald Trump ka shprehur mospajtim me vendimin e Londrës për të mos u përfshirë fillimisht në sulme. Në një intervistë për Telegraph, Trump u shpreh se kryeministri britanik “zgjati shumë” për të dhënë miratimin për përdorimin e bazave në operacione që ai i cilësoi si mbrojtëse. “Është detyra ime të gjykoj se çfarë është në interesin kombëtar të Britanisë”, u përgjigj Starmer, duke shtuar se vendimi për të mos marrë pjesë në sulmet fillestare ishte i qëllimshëm.
Kryeministri britanik theksoi se rruga më e mirë përpara mbetet një zgjidhje e negociuar, ku Irani heq dorë nga çdo aspiratë për zhvillimin e armëve bërthamore dhe ndalon aktivitetet destabilizuese në rajon. Ai bëri të ditur se avionët luftarakë britanikë janë ngritur në ajër si pjesë e operacioneve të koordinuara mbrojtëse dhe se këto veprime kanë rezultuar efektive, përfshirë rrëzimin e një droni që po i drejtohej një baze me personel britanik.
Starmer deklaroi se Irani ka lëshuar qindra raketa dhe mijëra dronë në vende që nuk e kanë sulmuar drejtpërdrejt dhe se rreth 300 mijë shtetas britanikë ndodhen aktualisht në rajon, përfshirë banorë, turistë dhe persona në tranzit. Ai shtoi se aeroportet dhe hotelet ku qëndrojnë qytetarë britanikë janë goditur, duke e cilësuar situatën thellësisht shqetësuese.
Kryeministri konfirmoi gjithashtu se një dron ka goditur bazën RAF Akrotiri në Qipro, por theksoi se bazat britanike në ishull nuk po përdoren nga bombarduesit amerikanë dhe se sulmi ndaj kësaj baze nuk ishte në përgjigje të ndonjë vendimi të marrë nga Londra.