Presidenti i Rusisë, Vladimir Putin, ka kritikuar Evropën për përhapjen e “histerisë” dhe “historive horror”, pas paralajmërimeve nga Franca dhe Gjermania për një sulm të mundshëm rus në kontinent. Deklaratat u bënë gjatë një vizite të Putinit në Kinë.
Putin e quajti alarmizmin e udhëheqësve evropianë për një sulm të mundshëm rus si të tepruar dhe të pabazuar. Ai theksoi se Moska nuk ka kundërshtuar kurrë një anëtarësim të mundshëm të Ukrainës në Bashkimin Evropian dhe se është e mundur të gjendet një konsensus për sigurinë e Ukrainës dhe Rusisë.
Dje, Francë njoftoi spitalet për të përgatitur një “angazhim të mundshëm të madh” deri në mars 2026, duke parashikuar një skenar ku vendi mund të trajtojë një numër të madh ushtarësh të plagosur nga vetë Franca dhe vendet e tjera evropiane.
Ndërkohë, Gjermania deklaroi se forcat e saj dhe NATO do të jenë në gatishmëri përpara stërvitjeve ushtarake të Rusisë në Bjellorusi, të njohura si Zapad 2025. Shefi i mbrojtjes gjermane, Carsten Breuer, tha se, megjithëse nuk pritet një sulm ndaj territorit të NATO-s, vendi i tij do të qëndrojë “në gatishmëri”.
Putin shtoi se Rusia është e gatshme të diskutojë sigurinë e Ukrainës, duke përmendur takimin e tij më 15 gusht në Alaska me Presidentin e SHBA-së, Donald Trump, ku u diskutuan mundësitë për të siguruar paqe dhe siguri në rast të përfundimit të konfliktit.
Ai theksoi se çështja e NATO-s dhe përfshirjes së saj në rajon mbetet temë e veçantë, por për anëtarësimin e Ukrainës në BE, Rusia nuk ka pasur asnjë kundërshtim.