Përpjekjet për krijimin e një qeverie të re në Suedi kanë hyrë në ngërç, pasi partitë e qendrës së majtë nuk kanë arritur të kapërcejnë mosmarrëveshjet mes tyre.
Liderja e Socialdemokratëve, Magdalena Andersson, njoftoi dështimin e negociatave rreth dy javë pas zgjedhjeve parlamentare të 13 shtatorit, në të cilat partia e saj doli forcë e parë me 28% të votave.
Socialdemokratëve iu besua përpjekja për formimin e qeverisë pasi katër parti kishin deklaruar mbështetjen për Andersson si kryeministre. Së bashku, Socialdemokratët, të Gjelbrit, Partia e Qendrës dhe Partia e Majtë kontrollonin 176 nga 349 mandatet në Parlament.
Megjithatë, marrëdhëniet mes Partisë së Majtë dhe Partisë së Qendrës u përkeqësuan, pasi të dyja kundërshtonin përfshirjen e njëra-tjetrës në qeveri.
Situata u tensionua më tej kur Partia e Majtë deklaroi mbështetjen për Andreas Norlén, nga Partia e Moderuar konservatore, për drejtimin e Parlamentit. Andersson e konsideroi këtë një sinjal se e Majta po largohej nga grupi që po negocionte për krijimin e qeverisë.
Nga ana tjetër, liderja e Partisë së Majtë, Nooshi Dadgostar, e kundërshtoi këtë interpretim, duke deklaruar se mbështetja për Norlén lidhej me përvojën e tij në drejtimin e Parlamentit.
Andreas Norlén u rizgjodh kryetar i Parlamentit me 200 vota pro dhe 146 kundër.
Pas dështimit të negociatave, procesi për formimin e qeverisë suedeze duhet të nisë sërish. Norlén pritet t’ia ngarkojë një tjetër partie detyrën për të tentuar krijimin e një shumice qeverisëse.
Mes emrave që mund të marrin përsipër këtë proces është edhe Ulf Kristersson, ish-kryeministri konservator, i cili dha dorëheqjen pas rezultatit të zgjedhjeve.