Kryeministri i Izraelit, Benjamin Netanyahu, ka sulmuar kryebashkiakun e Nju Jorkut, Zohran Mamdani, pak para nisjes së tij drejt qytetit, ku do të marrë pjesë në punimet e Asamblesë së Përgjithshme të OKB-së.
Në një video të publikuar në X, Netanyahu akuzoi Mamdanin se mbështet Hamasin dhe se nxit veprime kundër komunitetit hebre në Nju Jork.
“Turp për ty, zoti Mamdani”, u shpreh Netanyahu, duke shtuar: “Turp për ty që mbështet përbindëshat terroristë të Hamasit që masakruan popullin tonë. Turp për ty që nxit trazira kundër hebrenjve të Nju Jorkut”.
Netanyahu tha gjithashtu se gjatë qëndrimit të tij në OKB do të paraqesë versionin e tij për zhvillimet në Lindjen e Mesme, si dhe për akuzat që ka bërë ndaj kryebashkiakut të Nju Jorkut.
“Do të vij në OKB. Do të them të vërtetën për ushtarët tanë heroikë. Dhe do të them të vërtetën për ty”, deklaroi kryeministri izraelit.
Nga ana tjetër, në një intervistë për CNN, Mamdani e ka cilësuar Netanyahun si “kriminel lufte” dhe e ka akuzuar për zhvillimet në Gaza.
“Sa i përket Benjamin Netanyahut, e kam përshkruar ashtu siç besoj se është, një kriminel lufte dhe arkitekt i asaj që e konsideroj një gjenocid të tmerrshëm ndaj popullit palestinez”, deklaroi Mamdani.
Kryebashkiaku i Nju Jorkut tha se kjo çështje është diskutuar edhe gjatë takimit të tij me presidentin amerikan Donald Trump në rezidencën zyrtare të kryebashkiakut, Gracie Mansion.
Mamdani, i cili për muaj me radhë kishte deklaruar se do të urdhëronte arrestimin e Netanyahut nëse kryeministri izraelit do të vizitonte Nju Jorkun, tashmë ka pranuar se nuk ka kompetencat ligjore për ta bërë një gjë të tillë.