Rrëfime të reja tronditëse po dalin në dritë për zjarrin vdekjeprurës të natës së Vitit të Ri në barin Le Constellation në Zvicër ndërsa punëtorët dhe klientët thonë se një dalje emergjence në bodrum ishte “gjithmonë e mbyllur”.

Autoritetet zvicerane po hetojnë pronarët për vrasje nga pakujdesia, lëndime trupore dhe zjarrvënie të qëllimshme. Zjarri shpërtheu pak pas orës 1:30 të mëngjesit në bodrumin e barit kur fishekzjarrët e vendosura në shishe shampanje ndezën tavanin, i cili ishte i mbuluar me shkumë izoluese.

Videot tronditëse tregojnë klientët, shumë prej të cilëve ishin adoleshentë, që vazhdojnë të festojnë për disa sekonda të rëndësishme ndërsa zjarri përhapet mbi kokat e tyre. Kjo periudhë kohore rezultoi fatale, pasi momentet e çmuara që mund të kishin lejuar një arratisje në kohë u humbën.

Ndërsa paniku u përhap, dhjetëra njerëz u përpoqën të shpëtonin nëpërmjet një shkalle të ngushtë të brendshme që të çonte në katin përdhes, duke bërë që bari të përshkruhej më vonë si një “kurth vdekjeje”. Autoritetet tani po hetojnë nëse kapaciteti i vendit kishte tejkaluar limitin e lejuar atw natw.

Ankesat për daljet e emergjencës të mbyllura

Me rëndësi të veçantë janë ankesat për ekzistencën e një daljeje shtesë emergjence në bodrum, e cila sipas dëshmive nuk ishte e arritshme. Andrea, 31 vjeç, një bariste që punon në një dyqan tjetër në Crans-Montana, por që frekuentonte Le Constellation, tha se kishte si një hyrje-dalje të rregullt ashtu edhe një dalje emergjence të veçantë, e cila, siç tha ajo, ishte gjithmonë e mbyllur.

Siç e përshkroi ajo, kjo dalje ndodhej në një zonë të veçantë për duhanpirje, e cila në thelb përdorej si dhomë magazinimi. Një divan ishte vendosur përpara derës, ndërsa objektet hidheshin pikërisht jashtë saj, duke e bërë praktikisht jofunksionale. “Të gjithë në qytet e dinin se herët a vonë diçka do të shkonte keq”, tha ajo.

Grigory, i cili po shkonte në bar kur shpërtheu zjarri dhe një mik i tij është midis të zhdukurve, dha dëshmi të ngjashme. Ai tha se kishte një dalje të dytë, por beson se ajo mbeti e mbyllur sepse disa klientë largoheshin pa paguar.

Në të njëjtën kohë, në katin përdhes të barit u gjet një dalje e tretë, e cila të çonte në një korridor të mbuluar pazaresh me dyqane, përfshirë një dyqan me qira. Megjithatë, ata që e përdornin do të duhej të kalonin nëpër një derë të dytë xhami për të dalë në rrugë. Autoritetet ende nuk kanë sqaruar nëse këto dyer ishin të hapura apo të mbyllura në kohën e zjarrit.

Ndërkohë, autoritetet zvicerane njoftuan se Jacques Moretti, 49 vjeç, dhe gruaja e tij Jessica, 40 vjeç, pronarë të barit, po hetohen zyrtarisht për vrasje të paqëllimshme, shkaktim lëndimesh trupore dhe zjarrvënie. Moretti u shfaq në publik për herë të parë që nga tragjedia pranë një restoranti që zotëron në fshatin fqinj Lens, por nuk pranoi t’u përgjigjej pyetjeve.

Policia deri më tani ka identifikuar tetë të vdekur zviceranë, katër burra dhe katër gra, përfshirë dy 16-vjeçarë. Megjithatë, më shumë se 30 familje ende po jetojnë një makth pritjeje, ndërsa procesi i identifikimit të viktimave të mbetura vazhdon, si dhe pesë persona të plagosur rëndë që janë në spital.

Psikologia Elvira Venturella, e cila po mbështet familjet, e përshkroi pritjen si “shkatërruese për qëndrueshmërinë mendore të njerëzve”, ndërsa prindërit e fëmijëve të zhdukur flasin për zemërim dhe dëshpërim. Midis të zhdukurve është 15-vjeçarja Charlotte Needham, një nxënëse në Londër, me shoqet e saj që bëjnë thirrje publike për informacion.

Autoritetet thonë se identifikimi i viktimave është një përparësi absolute, por pranojnë “barrën e padurueshme” që mbajnë familjet. Hetimi është duke vazhduar, me çështjen e daljeve të mbyllura të emergjencës që luajnë një rol qendror në ngjarje.