Presidenti i Kazakistanit, Kassym-Jomart Tokayev, ka nënshkruar një ligj të ri që ndalon mbulimin e fytyrës në hapësirat publike, duke iu bashkuar një trendi të vendeve të Azisë Qendrore për të kufizuar veshjet që lidhen me fenë islame.
Ligji ndalon veshjet që “ndërhyjnë në njohjen e fytyrës”, përveç rasteve të veçanta si ato mjekësore, moti i keq apo aktivitete sportive dhe kulturore. Megjithatë, teksti nuk përmend drejtpërdrejt fenë apo veshjet fetare si nikabi apo burka.
Tokayev e ka përshkruar këtë masë si një përpjekje për të promovuar identitetin etnik kazak dhe për të ruajtur traditat kulturore kombëtare. Kazakistani është një vend me shumicë myslimane, por me një qasje laike ndaj fesë.
Nisma të ngjashme janë marrë edhe nga shtetet fqinje. Në Taxhikistan, presidenti Emomali Rakhmon ka ndaluar veshjet që konsiderohen “të huaja për kulturën kombëtare”, ndërsa në Kirgistan dhe Uzbekistan ndalimet për mbulesat fetare të fytyrës janë zbatuar me gjoba dhe kontrolle policore.
Ky zhvillim pritet të shkaktojë reagime të ndryshme në rajon, sidomos mes komuniteteve fetare dhe mbrojtësve të lirive individuale.