Lavrov sfidon Perëndimin: Kosova u njoh, pse jo Krimea?

Kosova është rikthyer në fokusin e diskursit diplomatik rus, me Ministrin e Jashtëm Sergej Lavrov që përdor rastin e saj për të sulmuar standardet e dyfishta të Perëndimit dhe për të justifikuar ndërhyrjet në Ukrainë.

Gjatë konferencës “Tokat Historike të Rusisë Jugore: Identiteti Kombëtar dhe Vetëvendosja e Popujve”, Lavrov deklaroi se njohja ndërkombëtare e pavarësisë së Kosovës ka krijuar një precedent që Perëndimi refuzon ta pranojë në rastet që nuk i përshtaten interesave të tij.

Ai u ndal në mënyrë të veçantë te pavarësia e shpallur e Kosovës në vitin 2008, duke e quajtur një akt të njëanshëm të mbështetur nga Perëndimi, ndonëse, sipas tij, ekzistonte një rezolutë e Këshillit të Sigurimit që e konsideronte Kosovën pjesë të Serbisë.

Lavrov krahasoi këtë situatë me zhvillimet në Ukrainë, duke përmendur referendumin në Krime dhe konfliktin në Donbas. Sipas tij, në të dyja rastet, popullata lokale reagoi ndaj “grushtit të shtetit” në Kiev, por Perëndimi e cilësoi ndërhyrjen ruse si shkelje të integritetit territorial të Ukrainës – ndryshe nga rasti i Serbisë.

Ministri rus akuzoi Perëndimin për qasje selektive ndaj parimit të vetëvendosjes dhe zbatimit të Kartës së OKB-së, duke theksuar se të njëjtat parime nuk zbatohen në mënyrë të njëtrajtshme në konfliktet ndërkombëtare.