Irani është tronditur nga një ofensivë e befasishme dhe e koordinuar që përfshiu sulme ajrore, shpërthime nga brenda territorit dhe një valë dronësh, në një operacion të koduar “Luani në ngritje”, që mban firmën izraelite.
Objektiva kyç në Teheran dhe në qendrën bërthamore të Natanzit u goditën, duke shkaktuar dhjetëra viktima, mes tyre komandantë të lartë të Gardës Revolucionare dhe gjashtë shkencëtarë bërthamorë. Sipas mediave izraelite, operacioni ishte planifikuar prej vitesh dhe përfshiu skuadra të Mossad-it që depërtuan në territorin iranian për të vendosur armë pranë sistemeve të mbrojtjes ajrore, ndërkohë që automjete civile ishin pajisur me mjete shpërthyese për të sulmuar objektiva strategjikë në të njëjtën kohë.
Një bazë sekrete e brendshme me dronë të armatosur u aktivizua gjatë natës për të neutralizuar raketat tokë-tokë iraniane. Kryeministri Benjamin Netanyahu deklaroi se operacioni kishte si synim çaktivizimin e kapaciteteve bërthamore të Iranit dhe e cilësoi ndërhyrjen si një arritje madhore të koordinimit ushtarak. Ndërsa Shtetet e Bashkuara u distancuan nga sulmi, ato paralajmëruan Iranin të mos shënjestrojë bazat amerikane.
Në përgjigje, Irani lëshoi mbi 100 dronë drejt Izraelit dhe kërcënoi me një “hakmarrje të hidhur”. Situata mbetet e ndezur, me frikën se një konflikt i hapur ushtarak në rajon është më i afërt se kurrë.