Hapat konkret drejt barazisë gjinore “po zhduken para syve tanë”.
Lajmin e ka bërë të ditur të hënën Sekretari i Përgjithshëm i Kombeve të Bashkuara, António Guterres.
Duke folur me grupin e OKB-së për të drejtat e grave përpara Ditës Ndërkombëtare të Gruas më 8 Mars, Guterres tha se barazia gjinore është “300 vjet larg” sipas vlerësimeve të fundit nga UN Women, organizatë e OKB-së e dedikuar për barazinë gjinore dhe fuqizimin e grave.
Guterres përmendi gjithashtu edhe shkallët e larta të vdekshmërisë amtare, vajzat që detyrohen të martohen në moshë të hershme dhe vajzat që rrëmbehen dhe sulmohen pasi vendosin të ndjekin shkollën si dëshmi se shpresa për arritjen e barazisë gjinore “po bëhet gjithnjë e më e largët”.
Në fjalimin e tij, Guterres nuk përmendi Iranin, i cili u përjashtua nga komisioni 45 anëtarësh në dhjetor për shkak të protestave pas vdekjes së Mahsa Amini në paraburgimin e të ashtuquajturës “polici të moralit” të vendit.
“Të drejtat e grave po abuzohen, kërcënohen dhe shkelen në mbarë botën,” tha Guterres, duke përmendur disa vende në veçanti, duke përfshirë Afganistanin, ku tha se “gratë dhe vajzat janë fshirë nga jeta publike”.
Raporti i paraqitur në Këshillin e të Drejtave të Njeriut në Gjenevë të hënën vuri në dukje gjithashtu rritjen e martesave të detyruara dhe të fëmijëve, ndalimin e përjashtimit të grave nga hapësira të tjera publike si parqet dhe palestrat, dhe kufizime të tjera që kufizojnë aftësinë e grave për të punuar dhe udhëtuar të pavarura në Afganistan.
Guterres tha se zëvendëssekretari i përgjithshëm dhe drejtori ekzekutiv i UN Women vizituan së fundmi Afganistanin dhe u kanë përcjellë autoriteteve talebane se “ne nuk do të heqim dorë kurrë nga lufta për” gratë dhe vajzat.
“Kriza dhe konflikti prek gratë dhe vajzat”, tha Guterres, duke përfshirë luftën në Ukrainë si shembull. Vitin e kaluar, OKB-ja bëri thirrje për një hetim mbi raportet e përdhunimit dhe dhunës seksuale ndaj grave dhe fëmijëve ukrainas pas pushtimit të Rusisë.