Kryeministri i ardhshëm i Hungarisë, Peter Magyar, ka paraqitur kushte të reja për të mbështetur hapjen e negociatave të anëtarësimit të Ukrainës në Bashkimin Europian, sipas Bloomberg.
Ai ka kërkuar në mënyrë të veçantë zgjerimin e të drejtave për pakicën hungareze që jeton në Ukrainë, duke reflektuar qëndrime të ngjashme me ato të kryeministrit aktual, Viktor Orban.
Këto kërkesa u paraqitën gjatë një takimi në Bruksel me presidentin e Këshillit Europian, Antonio Costa, në kuadër të diskutimeve për procesin e zgjerimit të Bashkimit Europian dhe situatën politike në rajon.
Ndërkohë, Bashkimi Europian po përpiqet të bindë Hungarinë që të heqë bllokadën ndaj nisjes së negociatave me Ukrainën, një hap i rëndësishëm për perspektivën europiane të Kievit.
Megjithatë, Budapesti vazhdon të mbajë qëndrimin e tij, duke kërkuar garanci shtesë për të drejtat e komunitetit hungarez në Ukrainë, përfshirë akses të plotë në arsimin në gjuhën hungareze dhe mbrojtjen e identitetit kulturor.
Ky qëndrim i Hungarisë mbetet një nga pengesat kryesore në procesin e zgjerimit të Bashkimit Europian drejt Ukrainës, në një kohë kur Brukseli synon të përshpejtojë integrimin e vendeve të Evropës Lindore në union.