Gjiganti amerikan i teknologjisë, Microsoft, ka njoftuar për përpjekjet e ndikimit nga Rusia, Irani dhe Kina në zgjedhjet presidenciale të SHBA-së që do të zhvillohen më 5 nëntor. Clint Watts, menaxheri i përgjithshëm në Qendrën e Analizës së Kërcënimeve pranë Microsoft, theksoi se qeveria amerikane ka ndërmarrë masa për të zbuluar aktivitete kibernetike dhe përpjekje ndikimi nga aktorët e huaj.
Në një postim në blog, Watts zbuloi se aktorët kibernetik iranianë ishin identifikuar duke dërguar “materiale të vjedhura, jo publike” nga fushata e ish-presidentit Trump tek organizatat mediatike dhe individët që ishin të angazhuar në fushatën e presidentit Joe Biden para tërheqjes së tij nga gara.
Ai gjithashtu përmendi se aktorët rusë kishin shënjestruar fushatën e Partisë Demokratike Harris-Walz, duke përdorur inteligjencën artificiale për të krijuar video të rreme për zëvendëspresidenten Kamala Harris. Këto video përshkruanin komente nënçmuese në lidhje me kundërshtarin e saj, Trump, dhe një tjetër video për Tim Walz, e cila kishte arritur mbi 5 milionë shikime.
Watts gjithashtu theksoi se operacionet kineze të ndikimit përqendroheshin te kandidatët më pak të njohur dhe te anëtarët e Kongresit Amerikan. Ai paralajmëroi se këta aktorë të huaj janë të aftë në shpërndarjen e përmbajtjeve mashtruese dhe se pritet që përpjekjet e tyre të vazhdojnë, përfshirë përdorimin e inteligjencës artificiale, për të vënë në dyshim integritetin e rezultatit të zgjedhjeve.
Duke përfunduar, Watts këshilloi për vigjilencë 48-orëshe para dhe pas zgjedhjeve, duke nënvizuar rëndësinë e mbrojtjes ndaj këtyre përpjekjeve të ndikimit.