Situata në Indonezi po përkeqësohet, pasi numri i viktimave nga përmbytjet dhe rrëshqitjet e dheut në ishullin Sumatra ka arritur në 303. Shifra u konfirmua të shtunën nga kreu i Agjencisë së Menaxhimit të Fatkeqësive, një rritje e ndjeshme nga raportimet e mëparshme prej 174 viktimash.
Prej një jave, Indonezia, Malajzia dhe Tajlanda janë goditur nga reshje të rrëmbyeshme të shkaktuara nga një ciklon, me një stuhi tropikale të rrallë që është formuar në ngushticën e Malakës. Ende 279 persona rezultojnë të zhdukur, ndërsa rreth 80 mijë banorë janë evakuuar. Qindra të tjerë vazhdojnë të jenë të bllokuar në tre provinca të Sumatras perëndimore.
Ekipet e shpëtimit po përdorin helikopterë për transport ndihmash në pjesën veriore të ishullit, zonë që ka pësuar dëmet më të mëdha, me rrugë të ndërprera dhe infrastrukturë komunikimi të shkatërruar. Autoritetet po përpiqen të hapin aksin nga North Tapanuli drejt Sibolga-s, i cili prej tre ditësh është i pakalueshëm për shkak të rrëshqitjeve të dheut. Sipas autoriteteve, banorë të bllokuar në këtë zonë kanë nevojë urgjente për furnizime.
Ndërkohë, në zonën e Central Tapanuli janë raportuar edhe tentativa për grabitje të ndihmave, pasi situata mbetet kritike. Forcat ushtarake pritet të shtohen të dielën për të ndihmuar operacionet e shpëtimit dhe shpërndarjen e ndihmave.
Edhe Tajlanda është goditur rëndë nga stuhitë. Në jug të vendit, numri i viktimave nga përmbytjet është rritur në 162, sipas njoftimeve të qeverisë, nga 145 që ishin raportuar më herët.