Mbi 500 nëna dhe foshnje vdiqën ose pësuan dëmtime për shkak të keqmenaxhimit në njësitë e maternitetit

Një hetim i gjerë mbi shërbimet e maternitetit në NHS ka zbuluar dështime serioze sistemike që, sipas raportit, kanë çuar në vdekjen ose dëmtimin e qindra nënave dhe foshnjave përgjatë më shumë se një dekade.

Raporti prej 401 faqesh analizoi rastet e rreth 2,500 familjeve në Nottingham University Hospitals NHS Trust dhe evidentoi mungesa të theksuara stafi, menaxhim të dobët dhe trajnim të pamjaftueshëm të personelit mjekësor.

Sipas gjetjeve, 444 gra dhe 76 foshnje pësuan dëmtime potencialisht të parandalueshme si pasojë e kujdesit të dobët në Queen’s Medical Centre dhe City Hospital Nottingham. Hetimi identifikoi gjithashtu të paktën 156 raste të vdekjeve të foshnjave dhe gjashtë raste të vdekjeve të nënave.

Raporti përshkruan një kulturë të rëndë presioni dhe frikësimi brenda institucioneve shëndetësore, ku shumë punonjës deklaruan se kishin përjetuar ngacmime në vendin e punës. Sipas dokumentit, shqetësimet e ngritura nga nënat shpesh nuk merreshin seriozisht, ndërsa ankesat për keqtrajtim mbeteshin pa u hetuar për vite me radhë.

Mes rasteve më të rënda të dokumentuara janë trajtimet e papërshtatshme të foshnjave pas vdekjes. Në një rast, një foshnjë u vendos në morg pranë trupit të një të rrituri të panjohur, ndërsa në një tjetër u etiketua gabimisht si “mbeturinë klinike”. Një familjeje iu dërguan aksidentalisht edhe fotografi nga autopsia e foshnjës së tyre.

Hetimi evidenton se problemet ishin të njohura që prej vitit 2010, por nuk u adresuan në mënyrë efektive nga drejtuesit e sistemit shëndetësor britanik.

Ndërkohë, autoritetet kanë arrestuar dy persona të moshës 55 dhe 59 vjeç në kuadër të hetimeve mbi funksionimin e morgut. Spitali përkatës ka paguar tashmë gjoba dhe kompensime për shkeljet e konstatuara, ndërsa Nursing and Midwifery Council po heton dhjetëra raste që lidhen me përgjegjësinë profesionale të stafit.

Raporti kërkon reforma urgjente në sistemin e maternitetit, rritje të përgjegjshmërisë dhe vendosjen e mekanizmave të rinj të sigurisë për pacientët, me synimin për të parandaluar tragjedi të ngjashme në të ardhmen.