Udhëheqësi i Koresë së Veriut, Kim Jong Un, është shfaqur në një atmosferë krejt ndryshe nga ajo e takimeve të zakonshme politike dhe ushtarake. I ulur në një kolltuk lëkure, me syze dielli dhe duke pirë duhan, lideri koreano-verior ka tërhequr vëmendjen me fotografitë e publikuara gjatë një vizite në një kompleks turistik dimëror pranë kufirit me Kinën.
Pamjet janë shpërndarë nga agjencia shtetërore e lajmeve KCNA dhe tregojnë Kim Jong Un duke pushuar dhe admiruar peizazhin malor, ndërsa pranë tij ndodhen familjarë dhe zyrtarë të lartë të Partisë së Punës.
Vizita është zhvilluar në zonën turistike të Samjiyon, një prej destinacioneve që autoritetet e Koresë së Veriut synojnë ta shndërrojnë në qendër të rëndësishme të turizmit malor.
Sipas mediave shtetërore, Kim e ka inspektuar kompleksin të dielën dhe të hënën, duke vizituar hotelet, vendpushimet e skive dhe objektet e tjera të ndërtuara në këtë zonë.
Në disa prej fotografive, ai shfaqet i buzëqeshur dhe i relaksuar, ndërsa bashkëshortja e tij, Ri Sol-ju, qëndron pas kolltukut ku është ulur.
Gjatë inspektimit, udhëheqësi koreano-verior ka shprehur kënaqësinë për cilësinë e punimeve, duke vlerësuar veçanërisht arkitekturën dhe kujdesin ndaj detajeve.
Sipas KCNA, Kim ka deklaruar se objektet turistike janë ndërtuar në mënyrë të përsosur dhe se peizazhi përreth krijon përshtypjen e një qyteti të vendosur mes pyjeve.
Samjiyon ndodhet pranë kufirit verior me Kinën, jo shumë larg malit Paektu, një vend me rëndësi të veçantë historike dhe simbolike për regjimin koreano-verior.
Mali konsiderohet i shenjtë në narrativën zyrtare të vendit dhe lidhet ngushtë me historinë e familjes Kim dhe figurën e ish-udhëheqësit Kim Jong Il.
Por publikimi i këtyre fotografive ka përkuar edhe me zhvillime të rëndësishme diplomatike.
Presidenti amerikan Donald Trump ka lënë të hapur mundësinë e një takimi të ri me Kim Jong Un gjatë vizitës së tij në Kinë, që pritet të zhvillohet këtë javë.
Duke folur për gazetarët, Trump është shprehur se një takim i tillë do të ishte i mirëpritur.
“Mund të takohemi me Kim Jong Un, kështu që kjo do të ishte mirë”, ka deklaruar presidenti amerikan.
Megjithatë, ai ka theksuar se realizimi i një takimi të mundshëm do të varej edhe nga presidenti kinez Xi Jinping dhe nga mundësia që lideri koreano-verior të udhëtonte drejt Kinës.
Trump dhe Kim Jong Un janë takuar tri herë gjatë mandatit të parë presidencial të republikanit, në përpjekje për të përmirësuar marrëdhëniet mes Uashingtonit dhe Phenianit dhe për të diskutuar çështjen e programit bërthamor të Koresë së Veriut.
Deri tani, nuk ka një konfirmim zyrtar për një takim të ri mes dy udhëheqësve.
Ndërkohë, fotografitë e Kim Jong Un nga vendpushimi malor kanë tërhequr vëmendjen për kontrastin mes imazhit të tij të zakonshëm si udhëheqës autoritar dhe paraqitjes së relaksuar gjatë vizitës turistike.
Me syze dielli, cigare në dorë dhe i rehatuar në kolltuk, lideri i Koresë së Veriut është shfaqur këtë herë larg sallave të mbledhjeve dhe paradave ushtarake, në një moment kur vëmendja ndërkombëtare është përqendruar te mundësia e një takimi të ri me presidentin amerikan.
