Kur dëgjohet emri Bermuda, mendja shkon zakonisht te i famshmi Trekëndëshi i Bermudës dhe historitë për anije e avionë të zhdukur në mënyrë misterioze. Në këtë rast, shkenca ka dhënë kryesisht përgjigje, duke ia atribuuar shumicën e incidenteve fenomeneve ekstreme atmosferike dhe gabimeve njerëzore. Këtë herë, megjithatë, vëmendja e shkencëtarëve nuk është përqendruar tek ajo që ndodh mbi Bermuda, por tek ajo që fshihet thellë poshtë tyre.
Një grup studiuesish ka zbuluar nën arkipelagun e Atlantikut të Veriut një “anomali” gjeologjike që nuk është vërejtur askund tjetër në planet. Sipas studimit, nën koren oqeanike të zonës së Bermudës ndodhet një shtresë shkëmbore me trashësi rreth 20 kilometra. Ky element është i pazakontë, pasi normalisht nën koren oqeanike ndodhet drejtpërdrejt manteli i Tokës.
Gjeologu William Fraser nga Carnegie Science në Uashington, duke folur për Live Science, shpjegoi pse ky zbulim konsiderohet unik.
“Zakonisht pritet që manteli të gjendet menjëherë nën koren oqeanike. Në rastin e Bermudës, megjithatë, ekziston një shtresë shtesë që është vendosur nën koren, brenda pllakës tektonike mbi të cilën ndodhet ishulli”, tha ai.
Origjina e kësaj shtrese jashtëzakonisht të trashë shkëmbore mbetet ende e panjohur. Shkencëtarët mendojnë, megjithatë, se ajo mund të lidhet me mënyrën se si janë formuar vetë Bermudat dhe me procesin që i ka nxjerrë ato mbi sipërfaqen e detit.
Arkipelagu ndodhet mbi një ngritje oqeanike, por aktiviteti vullkanik që mund ta ketë krijuar atë mbetet enigmatik. Shpërthimi i fundit i njohur vullkanik në këtë zonë daton rreth 31 milionë vite më parë. Një nga skenarët që po shqyrtohen është se ky shpërthim ka ngritur ndjeshëm fundin e oqeanit dhe se anomalia gjeologjike e zbuluar sot është gjurma e këtij procesi.
Siç thekson Fraser, studimi i rasteve gjeologjike “ekstreme” ka rëndësi më të gjerë shkencore.
“Duke kuptuar një vend kaq të veçantë si Bermudat, mund të kuptojmë më mirë edhe zonat që nuk shfaqin veçori kaq të theksuara. Kjo na ndihmon të dallojmë se cilat procese të Tokës janë më të zakonshme dhe cilat janë vërtet ekstreme”, shpjegoi ai.
Studiuesit theksojnë se thellësitë e oqeaneve vazhdojnë të fshehin sekrete të rëndësishme. Së fundmi, një tjetër ekip shkencor zbuloi ekzistencën e një kontinenti “të humbur”, Zealandia (Zealandia ose Te Riu-a-Māui), me moshë mbi një miliard vjet, pjesa më e madhe e të cilit ndodhet nën ujë. Tashmë, “Bermudat” i shtohen listës së zonave që tregojnë se sa shumë ka ende për të zbuluar planeti ynë nën sipërfaqen e tij.
