Një ngjarje e rëndë ka ndodhur në Kinë, ku një turist ka rënë nga një shkëmb 40 metra i lartë teksa përpiqej të bënte një ‘selfie’ në Parkun Malor Huangying në Guang’an.

Burri në fjalë, siç është kapur në video nga një dëshmitar okular, humbi ekuilibrin dhe papritmas e gjeti veten në boshllëk. Për fat të mirë, pavarësisht tronditjes dhe rrezikut që kaloi, ai arriti të mbijetojë.

Më vonë, ai tha në një postim në rrjetet sociale se ndjeu se “perënditë e malit e ndihmuan”.

“Rashë nga një shkëmb 40 metra i lartë dhe rrëshqita për gati 15 metra. Kur shkëmbinjtë u shembën nën këmbët e mia, mendova se do të vdisja. Është e mrekullueshme të jesh gjallë”, tha ai.

Klipi i rënies tronditëse të burrit ka qarkulluar në internet gjatë 24 orëve të fundit, por një zëdhënës i parkut natyror i tha gazetës “Mirror” se nuk kishin marrë një raport zyrtar për rënien e një vizitori.

Zona turistike ku dyshohet se ndodhi aksidenti, e njohur si “Blade Rock”, nuk është brenda kufijve të zonës turistike. Zëdhënësi theksoi se në këtë pikë “lejohet vetëm vëzhgimi nga distanca dhe në asnjë rrethanë nuk lejohet ngjitja”.

Zëdhënësi u kujtoi vizitorëve të respektojnë rregulloret e zonës turistike gjatë ecjes në natyrë dhe të mos hyjnë në zona të mbyllura ose të rrezikshme.