Rusia dhe Shtetet e Bashkuara po vijojnë kontaktet për mundësinë e një bashkëpunimi ekonomik mes dy vendeve, ndërsa Moska konfirmon se bisedimet me përfaqësuesit amerikanë janë ende në zhvillim.
Zëdhënësi i Kremlinit, Dmitry Peskov, deklaroi të premten se i dërguari presidencial rus Kirill Dmitriev ndodhet në SHBA dhe po zhvillon diskutime me negociatorë amerikanë për mundësitë e bashkëpunimit ekonomik.
“Ekziston një mirëkuptim se një bashkëpunim i tillë mund të jetë i dobishëm për të dyja palët. Diskutime të tilla në lidhje me mundësitë e ardhshme po zhvillohen me të vërtetë”, deklaroi Peskov.
Sipas CNN, që citon burime të njohura me zhvillimet, Dmitriev është takuar të enjten në Nju Jork me të dërguarin special amerikan Steve Witkoff dhe Jared Kushner, dhëndrin e presidentit Donald Trump.
Takimi dyshohet se është fokusuar te mundësitë për forcimin e dialogut ekonomik mes Moskës dhe Uashingtonit, por edhe te përpjekjet diplomatike për gjetjen e një zgjidhjeje për luftën në Ukrainë.
Edhe agjencia shtetërore ruse RIA raportoi se Dmitriev ndodhet në Nju Jork gjatë zhvillimit të punimeve të Asamblesë së Përgjithshme të OKB-së.
Në konferencën për shtyp, Peskov foli edhe për marrëdhëniet mes Uashingtonit dhe Pekinit. Ai tha se Moska po monitoron nga afër kontaktet e fundit mes SHBA-së dhe Kinës, duke i cilësuar ato si një “angazhim me rëndësi kritike”.
Sa i përket masave të reja amerikane ndaj Rusisë dhe Iranit, zëdhënësi i Kremlinit deklaroi se Moska ende nuk ka të qartë nëse dhe kur do të hyjnë në fuqi sanksionet e reja.
Legjislacioni amerikan parashikon zgjerimin e masave ndëshkuese ndaj Rusisë dhe individëve apo subjekteve që mbështesin luftën në Ukrainë, duke përfshirë zyrtarë rusë, oligarkë, familjarë të tyre, banka dhe institucione financiare.
Peskov reagoi gjithashtu ndaj vendimit të Bashkimit Evropian për të vendosur sanksione ndaj Xenia Fedorovës, ish-drejtuese e degës franceze të medias ruse RT. Ai e cilësoi masën si “presion të hapur mbi median” dhe “persekutim të përfaqësuesve të medias”.