Një operacion kërkimi në Himalajet e Nepalit ka përfunduar me shpëtimin e një 64-vjeçareje, e cila kishte qëndruar e izoluar për më shumë se dhjetë ditë pas një rrëshqitjeje masive akulli, gurësh dhe balte.
Chandika Shrestha u lokalizua më 5 shtator nga efektivët e Forcës së Armatosur të Policisë, gjatë kontrolleve që po zhvilloheshin në distriktin Nuwakot. Ajo ndodhej në katin e katërt të banesës së saj, një pjesë e së cilës ishte mbuluar nga materialet e sjella nga rrëshqitja.
Gjetja e saj e gjallë ka rikthyer shpresat e ekipeve të emergjencës, në një moment kur mundësitë për të zbuluar të mbijetuar të tjerë po zvogëloheshin me kalimin e ditëve.
Pas ndërhyrjes së forcave të shpëtimit, 64-vjeçarja u nxor nga ndërtesa dhe u dërgua me helikopter në një spital të kryeqytetit Kathmandu. Ajo po mbahet nën kujdesin e mjekëve, ndërsa nuk janë bërë të ditura hollësi të tjera për gjendjen e saj shëndetësore.
Operacionet po vazhdojnë në disa prej zonave më të goditura, ku dyshohet se mund të ketë ende persona të bllokuar nën baltë dhe rrënoja. Terreni i thepisur, dëmtimi i rrugëve dhe grumbullimi i madh i materialeve kanë vështirësuar ndjeshëm punën e skuadrave në terren.
Katastrofa ka prekur disa komunitete malore dhe ka shkaktuar dëme të konsiderueshme në banesa e infrastrukturë. Autoritetet po përpiqen njëkohësisht të lokalizojnë personat e zhdukur dhe të sigurojnë ndihma për banorët e izoluar.