Një komunikim i brendshëm i ushtrisë amerikane ka zbuluar shqetësimet në Uashington për mungesën e alternativave të qarta strategjike ndaj Iranit, ndërsa Komanda Qendrore e Shteteve të Bashkuara (CENTCOM) ka kërkuar propozime të reja dhe jokonvencionale për të ushtruar presion ndaj Teheranit.
Sipas CNN, një zyrtar i lartë i inteligjencës në CENTCOM u ka dërguar një email një numri të madh analistësh ushtarakë, duke kërkuar ide urgjente për mënyra të reja veprimi ndaj Iranit. “Na duhen ide”, thuhej në mesazhin e brendshëm, i cili sipas dy burimeve të njohura me komunikimin ishte autentik.
Kërkesa e pazakontë është interpretuar si një shenjë se administrata amerikane po përballet me një hapësirë gjithnjë e më të kufizuar opsionesh përballë Teheranit. Zyrtarë ushtarakë kanë pranuar se një kërkesë e tillë përmes emailit nuk është një praktikë e zakonshme dhe se CENTCOM po rishikon strategjitë e saj.
“Komanda Qendrore e SHBA-së ka një histori të gjatë të të menduarit dhe veprimit inovativ”, deklaroi kapiteni Timothy Hawkins, zëdhënës i CENTCOM-it.
Komunikimi u bë përpara deklaratave të presidentit amerikan Donald Trump për mundësinë e nisjes së sulmeve të reja ndaj Iranit. Sipas raportimeve, një operacion i planifikuar u anulua më vonë gjatë fundjavës pas ndërhyrjeve nga disa zyrtarë rajonalë, mes tyre edhe princi saudit i kurorës, i cili i kërkoi Trumpit të shmangte një përshkallëzim të mëtejshëm.
Trump deklaroi se sulmi ishte pezulluar me kusht që Shtetet e Bashkuara dhe Irani të arrinin shpejt një marrëveshje, duke pretenduar se kishte pasur përparim në negociata, përfshirë çështjen e Ngushticës së Hormuzit.
Megjithatë, nga ana e Iranit nuk ka pasur sinjale publike se Teherani ka kërkuar anulimin e sulmeve apo se ka ndryshuar qëndrimin e tij lidhur me këtë korridor të rëndësishëm strategjik detar.