Rusia dhe Bjellorusia kanë zhvilluar një nga stërvitjet më të mëdha bërthamore të viteve të fundit, duke rritur frikën për një përshkallëzim të ri të luftës në Ukrainë dhe tensioneve me NATO-n.
Presidenti bjellorus Aleksandër Lukashenko mori pjesë për herë të parë në simulimet për përdorimin e armëve bërthamore taktike dhe strategjike së bashku me Vladimir Putinin.
Gjatë manovrave ushtarake u përdorën raketa balistike Iskander-M, avionë luftarakë dhe sisteme të avancuara hipersonike.
Sipas analistëve, vendosja e më shumë armëve bërthamore ruse në territorin bjellorus mund të jetë sinjal se po përgatitet një zhvillim i madh ushtarak në rajon.
Ekspertët vlerësojnë se Moska po përpiqet të frikësojë Perëndimin dhe të ushtrojë presion ndaj Ukrainës përpara samitit të NATO-s.
Presidenti ukrainas Volodymyr Zelensky ka paralajmëruar se Rusia mund të përdorë Bjellorusinë si pikënisje për një ofensivë të re drejt veriut të Ukrainës dhe Kievit.
Nga ana tjetër, NATO ka reaguar duke deklaruar se çdo përdorim i armëve bërthamore do të sillte një përgjigje “shkatërruese”.
Megjithatë, disa analistë besojnë se Lukashenko po përpiqet të ruajë balancën mes Moskës dhe Perëndimit, duke shmangur përfshirjen direkte të Bjellorusisë në luftë.