18-vjeçarja Ridhvi Saxena kishte bërë tre vite përgatitje intensive për të bërë një provim të vetëm. Kur doli nga salla e testimit më 3 maj, ajo ishte e bindur se ishte një hap më pranë ëndrrës së saj për t’u bërë kardiologe.

Por kjo shpresë u shkatërrua! Mediat e huaja shkruajnë se, autoritetet indiane njoftuan se provimi ishte komprometuar nga rrjedhje të pyetjeve dhe urdhëruan përsëritjen e tij për të gjithë kandidatët.

Si pasojë, qeveria indiane ndërmori masa edhe më drastike këtë javë duke ndaluar përkohësisht në të gjithë vendin përdorimin e aplikacionit Telegram, ku sipas autoriteteve vepronin hapur rrjete mashtrimi që shisnin pyetje të rrjedhura të provimeve.

“Ndihem e mashtruar dhe e tradhtuar nga sistemi,” tha Saxena, studente nga qyteti Bhopal.

Ajo tregoi se kishte filluar të mendonte për jetën universitare dhe për lirinë pas viteve të sakrificave, por vendimi për të anuluar rezultatet e riktheu në stresin dhe presionin e përgatitjeve intensive.

Mbi 2 milionë studentë në të gjithë Indinë morën pjesë këtë vit në provimin NEET, testi kombëtar që shërben si porta hyrëse për fakultetet e mjekësisë. Provimi konsiderohet ndër më të vështirët në vend, së bashku me provimin e inxhinierisë JEE, dhe kërkon vite të tëra studimi intensiv.

Për shumë studentë që kishin kaluar vite duke u përgatitur, vendimi për të anuluar rezultatet ishte shkatërrues.

“Nëse ke sakrifikuar kohën me familjen dhe ke kaluar dy ose tre vite i mbyllur mes katër mureve me libra, dhe kur më në fund mendon se ke arritur fundin e rrugës, sistemi arsimor të zhgënjen,” tha Saxena.

Ndërkohë, Central Bureau of Investigation ka nisur hetime për rrjedhjen e pyetjeve, ndërsa Ministria e Elektronikës dhe Teknologjisë së Informacionit ndaloi Telegramin deri më 22 qershor duke u mbështetur në një ligj që lejon bllokimin e platformave online “në interes të sovranitetit dhe integritetit të Indisë”.

Autoritetet e testimit argumentojnë se masa do të ndihmojë në organizimin e provimeve më të sigurta.

Megjithatë, themeluesi i Telegramit, Pavel Durov, kundërshtoi vendimin, duke deklaruar se ndalimi po ndëshkon mbi 150 milionë përdorues të aplikacionit në Indi në vend që të godasë personat përgjegjës për rrjedhjen e materialeve të provimit.

“Sapo rrjedhjet u zhvendosën në aplikacione të tjera,” shkroi ai në rrjetet sociale.

Të premten, një gjykatë në New Delhi hodhi poshtë ankesën e Telegramit kundër ndalimit, duke argumentuar se qeveria kishte ndjekur procedurat ligjore.

Vendimi ka ngritur shqetësime tek aktivistët e të drejtave digjitale, të cilët paralajmërojnë se India po përdor gjithnjë e më shpesh kompetencat e saj për të kufizuar zërat kritikë në internet.

Organizata Internet Freedom Foundation deklaroi se ndalimi i Telegramit krijon një precedent shqetësues për lirinë e internetit në vend.

Skandali vjen në një periudhë të vështirë për sistemin arsimor indian. Bordi kombëtar i provimeve të shkollave të mesme është përballur me kritika të forta për probleme teknike në sistemin elektronik të vlerësimit, ku nxënësit kanë raportuar gabime në korrigjim dhe madje mungesë të fletëve të përgjigjeve.

Pakënaqësia ka çuar në protesta në disa rajone të vendit, përfshirë demonstrata të organizuara nga lëvizja anti-establishment Cockroach Janta Party, e cila ka kërkuar dorëheqjen e ministrit të Arsimit, Dharmendra Pradhan.

Megjithatë, shumë studentë nuk besojnë se ndalimi i Telegramit do ta zgjidhë problemin.

Sipas tyre, kushdo që dëshiron mund të vazhdojë ta përdorë aplikacionin përmes një rrjeti privat virtual (VPN), ndërsa masa nuk adreson shkakun kryesor: dështimin e autoriteteve për të parandaluar rrjedhjen e pyetjeve.

Pas vendosjes së ndalimit, kompania zvicerane Proton VPN raportoi një rritje prej 120% të regjistrimeve ditore nga India.

“Duket si një zgjidhje e përkohshme dhe sipërfaqësore. Autoritetet po përpiqen ta fshehin problemin në vend që të sigurojnë infrastrukturën,” tha 18-vjeçari Anoop Girijesh, i cili gjithashtu mori pjesë në provimin NEET.

Ai shtoi se masa nuk u jep studentëve më shumë besim, por krijon përshtypjen se autoritetet po përpiqen të heshtin reagimet publike në vend që të zgjidhin rrjedhjet.

Nga ana tjetër, Agjencia Kombëtare e Testimit u bëri thirrje studentëve të ruajnë besimin, duke deklaruar se për provimin e përsëritur janë vendosur masa të shumta sigurie dhe se vendimi për ritestim është marrë vetëm në interes të kandidatëve.

Megjithatë, shumë studentë mbeten skeptikë.

“Na kërkohet të japim maksimumin, por si mund ta bëjmë këtë kur vazhdimisht pyesim veten nëse procesi është vërtet i sigurt këtë herë?” tha Girijesh.

As Agjencia Kombëtare e Testimit dhe as Telegrami nuk dhanë komente shtesë mbi çështjen