Qeveria britanike ka njoftuar sot planin për krijimin e një karte të re identiteti dixhitale për qytetarët dhe banorët e përhershëm të vendit, në përpjekje për të frenuar punën e paligjshme dhe për të forcuar kontrollin mbi emigracionin e paligjshëm. Ky është një hap historik për Britaninë, ku nuk ka ekzistuar një kartë identiteti që nga fundi i Luftës së Dytë Botërore.

Sipas deklaratës së kryeministrit Keir Starmer, karta e identitetit do të jetë plotësisht dixhitale dhe do të ruhet në telefonat celularë, pa qenë nevoja që mbajtësit ta kenë fizikisht me vete. Ajo do të përdoret fillimisht për të verifikuar të drejtën për të punuar në Mbretërinë e Bashkuar – një kontroll që do të bëhet i detyrueshëm për të gjithë punëdhënësit deri në fund të mandatit aktual parlamentar, në vitin 2029.

“Kjo masë do ta bëjë më të vështirë punën e paligjshme dhe do të ndihmojë në shkatërrimin e rrjeteve kriminale që përfitojnë nga emigracioni i paligjshëm,” u shpreh Starmer. Ai shtoi se për qytetarët do të ketë edhe përfitime praktike, si akses më i lehtë në shërbime publike, duke përfshirë kujdesin për fëmijët, përfitimet sociale dhe të dhënat tatimore.

Sistemi i ri synon të mbyllë boshllëqet që kanë lehtësuar punësimin e emigrantëve të paligjshëm – një faktor që, sipas qeverisë, nxit kalimet e rrezikshme përmes Kanalit të La Manshit.

Megjithatë, propozimi ka hasur në kritika nga kundërshtarët politikë. Partia Reform UK e cilësoi planin si një “mashtrim cinik” për të fituar mbështetje politike, ndërsa konservatorja Kemi Badenoch e quajti atë “një dredhi” që nuk do të ndalojë kalimet e paligjshme të emigrantëve me anije. Ndërkohë, Liberal Demokratët kanë paralajmëruar se nuk do ta mbështesin një sistem të detyrueshëm të identifikimit dixhital, duke ngritur shqetësime mbi privatësinë dhe liritë civile.

Në Mbretërinë e Bashkuar, qytetarët aktualisht përdorin pasaportat apo lejet e drejtimit të automjetit për të provuar identitetin e tyre, por qeveria synon që karta e re dixhitale të bëhet standardi i ri për identifikimin dhe për akses në shërbime thelbësore.

Krijimi i një karte identiteti në Britani ka qenë për dekada një temë debati, dhe ky propozim shënon një ndryshim të rëndësishëm në qasjen e vendit ndaj kontrollit të identitetit dhe emigracionit.