Donald Trump ka deklaruar se Irani mund të jetë pranë pranimit të kërkesave të Shtetet e Bashkuara të Amerikës, ndërsa burime nga zyrtarë amerikanë flasin për rritje të gatishmërisë ushtarake në rajon.
Sipas raportimeve nga burime anonime, mijëra marinsa amerikanë janë vendosur në zonë, ndërkohë që forca speciale dhe njësi parashutistësh janë në lëvizje, duke shtuar praninë ushtarake dhe duke sinjalizuar përgatitje për skenarë të mundshëm operativë.
Administrata amerikane po shqyrton disa opsione, që variojnë nga një sulm i kufizuar ndaj terminalit kryesor të eksportit të naftës në Ishullin Kharg, deri te një operacion më i gjerë për të marrë nën kontroll rezervat e uraniumit të pasuruar të Iranit, të cilat Trump i ka përshkruar si “pluhur bërthamor”.
Duke folur nga bordi i Air Force One, Trump u shpreh se Irani mund të jetë i gatshëm të dorëzojë këto materiale, por paralajmëroi se në të kundërt, vendi do të përballet me pasoja të rënda.
Nga ana tjetër, kryetari i parlamentit iranian, Mohammad Bagher Ghalibaf, akuzoi presidentin amerikan se po përdor retorikën e negociatave si mbulesë për një ndërhyrje të mundshme ushtarake. Ai theksoi se Irani nuk do të dorëzohet dhe se forcat e tij janë të përgatitura për çdo përballje të mundshme.