Presidenti i Shteteve të Bashkuara, Donald Trump, ka publikuar një mesazh të fortë në platformën Truth Social, ku pretendon se negociatat për përfundimin e konfliktit me Iranin kanë shënuar “përparim të madh”.
Trump deklaroi se SHBA-të janë në bisedime me atë që e cilësoi si një “regjim të ri dhe më të arsyeshëm” në Teheran, megjithëse autoritetet iraniane e kanë mohuar kategorikisht ekzistencën e një zhvillimi të tillë.
Ai shtoi se mund të arrihet shpejt një marrëveshje me udhëheqjen iraniane dhe se aktualisht po zhvillohen si bisedime të drejtpërdrejta, ashtu edhe indirekte. Megjithatë, Trump nuk dha detaje konkrete se kush përfaqëson këtë “regjim të ri”, ndërsa ekspertët ndërkombëtarë theksojnë se struktura e pushtetit në Iran mbetet në thelb e pandryshuar.
Krahas sinjaleve për negociata, presidenti amerikan ka përsëritur edhe kërcënimet ushtarake, duke paralajmëruar se nëse nuk arrihet një marrëveshje së shpejti, SHBA mund të godasë infrastrukturën kyçe të Iranit, përfshirë termocentralet, puset e naftës dhe ishullin strategjik Kharg, i rëndësishëm për eksportet energjetike të vendit.
Trump gjithashtu theksoi se veprimet ushtarake mund të vijojnë nëse Irani nuk rihap Ngushticën e Hormuzit, një arterie jetike për tregtinë globale të naftës, e cila është prekur nga tensionet që prej nisjes së konfliktit më 28 shkurt.
Nga ana tjetër, zyrtarët iranianë kanë hedhur poshtë pretendimet për negociata direkte me Uashingtonin, duke i cilësuar deklaratat e Trump si të paqarta dhe kontradiktore, dhe duke theksuar se nuk ka bisedime zyrtare për armëpushim apo marrëveshje.