Kryeministri izraelit Benjamin Netanyahu ka përdorur fjalimin e tij në Asamblenë e Përgjithshme të Kombeve të Bashkuara për të kritikuar ashpër Turqinë dhe Katarin, ndërsa vuri në pah marrëdhëniet e ngushta me Shtetet e Bashkuara dhe presidentin Donald Trump.
Në adresimin e tij, Netanyahu sulmoi presidentin turk Recep Tayyip Erdogan, duke e cilësuar atë si “tiran” dhe duke akuzuar Turqinë se strehon dhe mbështet Hamasin. Ai ngriti gjithashtu kritika ndaj politikave të Ankarasë lidhur me kurdët, Qipron, Greqinë dhe lirinë e medias.
Kryeministri izraelit nuk kurseu kritikat as ndaj Katarit. Netanyahu pretendoi se Doha shpenzon miliarda dollarë për të përhapur atë që ai i konsideron narrativa dhe akuza të rreme kundër Izraelit. Sipas tij, Katari përdor financimin e universiteteve amerikane dhe mbështetjen për media si Al Jazeera për të ndikuar opinionin publik në SHBA dhe në vendet perëndimore.
Në pjesën tjetër të fjalimit, Netanyahu vlerësoi bashkëpunimin me Uashingtonin, duke deklaruar se Izraeli dhe Shtetet e Bashkuara kanë vepruar së bashku për përballimin e konflikteve në Lindjen e Mesme dhe për përpjekjet për lirimin e pengjeve të mbajtura në Gaza.
Ai lavdëroi gjithashtu ushtrinë izraelite dhe deklaroi se shoqëria në Izrael mbetet e bashkuar përballë sfidave të sigurisë dhe zhvillimeve të konfliktit në rajon.